28/03/2014 10:16:14

Më shumë lehtësira për të huajt që duan nënshtetësi gjermane

Fëmijët e shtetasve të huaj (vendet e të cilëve nuk janë pjesë e BE-së) të lindur në Gjermani mund të marrin nënshtetësinë gjermane edhe atë të prindërve të tyre

BERLIN - Konservatorët e kancelares gjermane, Angela Merkel (CDU/CSU) dhe partnerët e tyre të koalicionit qeveritar, socialdemokratët (SPD) ranë dakord sot për zgjerimin e formatit të mundësive për nënshtetësinë e dyfishtë për fëmijët e shtetasve të huaj në Gjermani.

Marrëveshja parashikon që fëmijët e shtetasve të huaj (vendet e të cilëve nuk janë pjesë e BE-së) të lindur në Gjermani mund të marrin nënshtetësinë gjermane edhe atë të prindërve të tyre, nëse ata kanë jetuar për tetë vjet në territorin gjerman ku janë arsimuar përgjatë gjashtë viteve në vend, ose nëse e ekuivalentojnë një kualifikim profesional ose marrin një diplomë universitare në Gjermani.

Kjo marrëveshje u njoftua sot nga ministri i Drejtësisë, Heiko Maas dhe ministri i Brendshëm, Thomas de Maizière. Kjo dispozitë ishte një prej kërkesave të SPD për të pranuar hyrjen në qeverinë e koalicionit me konservatorët.

“Kemi gjetur një zgjidhje të mirë për nënshtetësinë e dyfishtë”, shprehej Maas në një komunikatë të publikuar në faqen zyrtare të internetit të ministrisë së Drejtësisë. “Të rinjtë, jeta e të cilëve ka mnisur në Gjermani nuk do të jenë më të detyruar të shkëpusin lidhjet e tyre rrënjësore me prejardhjen familjare”, theksonte ai.

HermesNews - ©2014

Dërgo me email | Stampo artikullin