26/03/2014 19:35:28

Në burg paguan vetëm shteti

nga Doriana Metollari

HermesNews - Nuk ndalem për t'u marrë me papërgjegjshmërinë e shkelësve të rregullave të qarkullimit rrugor apo mbajtësit e lëndëve plasëse e aq më pak me kartat SIM. Kisha për të thënë diçka për FMNnë, por jo kësaj herë.

Njoh familje që janë mbi 1 milion Lekë në borxh me KESH-in. Njoh dhe biznese që fitojnë para me lopatë dhe nuk paguajnë asnjë ditë energji elektrike sepse u japin elektriçistëve nën dorë, dhe nuk kanë të rregjistruar asnjë copë faturë për be gjatë gjithë vitit.

Këto janë të gjitha realitete që i kam parë çdo ditë. Për asnjë prej tyre nuk ka një ilaç të përgjithshëm. Një familjar që mban fëmijët me 20 mijë Lekë në muaj, mbani vesh, thashë 20 mijë lekë në muaj, dhe punon në të zi, nuk mund të paguajë një borxh ndaj KESH-it prej më shumë se 1 milion Lekë.

Nuk ka arritur të paguajë as faturat tre mije leke çdo muaj.

Sa familje ka në Shqipëri, që nuk arrijnë të paguajnë faturat e KESH ? Çfarë do të bëhet me to ? Do të futen të gjithë në burg, nën akuzën për mospagesë të shumës së borxhit ndaj KESH ?

A mund të ketë një amnisti para se qeveria të fillojë fushatën "paguaj për FMNnë" ?

Pesë vite burg, për vjedhësit e energjisë elektrike, është një masë që në rastet të duhura për ata që vjedhin pa hesap dhe fitojnë pa hesap mund të funksionojë, por për një familjar që është i zhytur në borxhe, mund të amnistohet.

Amnistia nuk do të thotë të falen të gjithë, por të mos përdoret e njëjta dorë e hekurt për të gjithë vjedhësit. Sepse ka hajdutë të pasur, por ka dhe prej atyre që punojnë për një copë bukë dhe me keta te fundit, para se të fillohet me mbledhjen e pagesave të vonuara, mund t'u falet ajo që kanë mbledhur pa paguar, sepse në burg paguan vetëm shteti.

HermesNews - ©2014

Dërgo me email | Stampo artikullin