25/03/2014 20:08:15

Vlorë, strategji të reja antidroge

Gjatë vitit të kaluar në këtë qark u zbuluan 174 parcela të mbjella me bimën narkotike kanabis sativa

VLORË - Ministria e Brendshme dhe Drejtoria e Përgjithshme e Policisë së Shtetit, kanë hartuar dhe po zbatojnë një Plan Kombëtar Veprimi për të minimizuar dhe parandaluar fenomenin e kultivimit dhe të trafikimit të bimëve narkotike, kanabis sativa.

Kjo u theksua sot, gjatë një takimi në Drejtorinë e Policisë së Qarkut të Vlorës, ku u diskutua për gjendjen në këtë njësi vendore dhe masat që po merren e do të merren për të goditur këtë fenomen.

Gjatë vitit të kaluar në këtë qark u zbuluan 174 parcela të mbjella me bimën narkotike kanabis sativa, në 64 raste të evidentuara dhe me 8 persona të dyshuar si autorë, katër prej të cilëve u arrestuan në kushtet e flagrancës.

Kjo situatë, e trashëguar nga viti paraardhës, duhet dhe do të ndryshojë, gjë që kërkon angazhimin e të gjitha strukturave të shtetit në një aksion kombëtar.

Në fazën e parë, që është ajo e sensibilizimit dhe që përkon me këtë periudhë, do të zhvillohet një fushatë e gjerë takimesh në të gjithë hapësirën dhe njësitë e qeverisjes vendore, ku do të qartësohen për komunitetin pasojat sociale dhe ato ligjore, që rrjedhin nga kjo dukuria.

Përmes takimesh të planifikuara dhe mjeteve e metodave të promovimit, do të bëhen të qarta edhe klauzolat ligjore dhe sanksionet e tjera, pë rata që në një formë apo tjetrën, do të përfshihen në këtë dukuria.

Në fazën e dytë, që është ajo operacionale, parashikohen ndërhyrje në terren për të gjitha ato raste që do të identifikohen në kultivimin e bimëve narkotike.

Në këtë takim, ku ishin të pranishëm edhe Prefekti i Qarkut, Besnik Dervishi, zëvendës Drejtori i Policisë së Shtetit, Altin Qato, u diskutua për rrugët konkrete që do të ndiqen për ta nxjerrë përfundimisht Qarkun e Vlorës nga harta problematike në këtë drejtim.

HermesNews - ©2014

Dërgo me email | Stampo artikullin