24/03/2014 17:33:15

Media komenton zgjedhjet në Francë

Gazetat britanike konstatojnë se Franca po anon djathtas, duke e vënë theksin tek shprehja e pakënaqësisë së francezëve ndaj qeverisë socialiste

PARIS - Gazetat europiane theksuan sot arritjen shqetësuese të Frontit Kombëtar (FN) në turin e parë të zgjedhjeve lokale në Francë, rritja historike e të cilës duhet të shërbejë si sinjal për Europën.

Shtypi italian shqetësohet për këtë rritje populiste dhe analizon pasojat për Europën, pasi të përditshmet e mëdha e vënë theksin tek arritja personale e kryetares së FN-së, Marine Le Pen, e cila ”realizoi kryeveprën politike që i ati nuk e arriti dot”, shkruan ”Corriere della Serra“.

”Ajo zbuti argumentet ksenofobe dhe raciste dhe diti të bashkohet me shqetësimet e qytetarëve përballë një Evrope të largët, të ndryshuar në krahasim me idealet që e themeluan”, komenton gazeta që sheh në këtë “hop” të arritur prej saj “një tronditje populiste” dhe “një sinjal për Evropën”, disa javë përpara zgjedhjeve evropiane. ”Triumfi i zonjës me të zeza i hap rrugën euroskeptikëve”, ishte titulli kryesor i të përditshmes “la Stampa“.

“La Repubblica” këmbëngul në “shuplakën që mori Hollande”, duke qenë në të njëjtën linjë me të përditshmen liberale gjermane “Frankfurter Allgemeine Zeitung” e cila kishte titull kryesor ”disfatën delikate” të socialistëve të presidentit Hollande.

Sipas të përjavshmes ”Der Spiegel“, “Fronti Kombëtar po e ligjëron veten si forca e tretë, një shuplakë për presidentin francez”. Gazetat britanike konstatojnë se Franca po anon djathtas, duke e vënë theksin tek shprehja e pakënaqësisë së francezëve ndaj qeverisë socialiste.

Korrespondenti i BBC Radio Four në Francë, Christian Fraser vinte në opinionin e përgjithshëm të elektoratit se “socialistët nuk shkuan aq larg, ose jo aq shpejt sidomos lidhur me papunësinë, koston e punës, zvogëlimin e borxhit dhe këshillonte “një ndryshim të pashmangshëm qeveritar gjatë javëve të ardhshme”.

”Le Daily Telegraph” theksonte kënaqësinë e Marine Le Pen, e cila arriti një rezultat “historik”. I njëjti konstatim edhe në Spanjë, ku ”El Pais” fliste për një arritje “historike” të FN-së falë “mesazhit populist dhe kundër rinovimt të sistemit dhënë nga Marine Le Pen”.

Sipas të përditshmes belge “Le Soir“: “Nuk është habi. Dy shqetësimet që ekzistonin që prej disa javësh, u vërtetuan. Abstemi dhe ekstremi i djathtë janë dy fituesit e mëdhenj të turit të parë të zgjedhjeve lokale franceze”.

HermesNews - ©2014

Dërgo me email | Stampo artikullin