20/03/2014 17:55:17

Në Maj, harta e re e Shqipërisë

Ministri Bled Çuci ka nisur një tur konsultimesh në çdo qark ku 12 grupe pune rajonale po punojnë për përafrimin e hartës së parë

TIRANE - Harta e ndarjes së re administrativo-territoriale do të publikohet në fillim të muajit maj. Lajmin e konfirmoi sot në një intervistë televizive, Enea Hoti, këshilltari i Ministrit të Shtetit për Çështjet Vendore, Bled Çuci. Sipas tij, harta do të vijë në formën e variantit të parë ku më pas do të jetë objekt i konsultimeve të gjera i të gjithë faktorëve me interes politik, ekonomik e social si dhe sipërmarjes. “Ministri ka nisur një tur konsultimesh në çdo qark ku 12 grupe pune rajonale po punojnë për përafrimin e hartës së parë”, tha ai. Megjithëse numri i rajoneve që do të përbëjnë hartën e re ende është në proces konsultimi, ai tha se niveli i dytë i qverisjes vendore, Qarqet, mund të jenë katër ose gjashtë të tillë dhe se përcaktimi i kufijve do të bëhet kryesisht duke respektuar diversitetin gjeografik dhe basenet ujore por edhe zhvillimet ekonomike rajonale. Hoti përsëriti objektivin e qeverisë për pregatitjen dhe prezantimin në Parlament të paketës ligjore për ndarjen e re adminsitrativo-territoriale, brenda korrikut të këtij viti, në mënyrë që produkti të jetë i zbatueshëm menjëherë pas zgjedhjeve vendore të vitit 2015. Referuar kritereve mbi të cilat do të bazohet ndarja e re, këshilltari i Ministrit tha se, “numri i popullsisë për njësi, është kriter shumë i rëndësishëm por, kriteri bazë është funksionaliteti nga pikpamja ekonomike, sociale dhe zhvillimore dhe aftësia për të kryer investime”.

HermesNews - ©2014

Dërgo me email | Stampo artikullin