20/03/2014 14:03:44

''Lajmi tragjik për shqiptarët''

Berisha, shqiptarëve, me marrëveshjen e FMN-së do t’iu rriten taksa të tjera

TIRANË - Kuvendi u mblodh në seancën plenare të radhës për të diskutuar disa projektligje dhe marrëveshje. Pikë kryesore e rendit të ditës është shqyrtimi i disa ndryshimeve në ligjin ”Për parandalimin dhe goditjen e krimit të organizuar dhe trafikimit nëpërmjet masave parandaluese kundër pasurisë”. Pr/ligji, parashikon sekuestrim të pasurisë edhe të familjarëve të shkelësve të ligjit, për sa kohë dyshohet se pasuria është fituar ilegalisht.

Në fillim të punimeve Kuvendi u përfshi të enjten nga debati për shkak të mungesës së konsensusit për kalendarin trejavor të punimeve.

Në fillim të seancës kryetari i Kuvendit, Ilir Meta njoftoi se një ditë më parë konferenca e kryetarëve nuk gjeti mirëkuptim për kalendarin e punimeve dhe në këto raste miratimi i tij bëhet në seancë, duke respektuar nenin katër të rregullores parlamentare.

Ish-kryeministri Sali Berisha tha sot në Kuvend se marrëveshja me Fondin Monetar Ndërkombëtar është një lajm tragjik për shqiptarët, pasi zbatimi i saj do të pasohet me rritjen e një numri taksash në kurriz të tyre dhe ngrirje të pagave.

“Shqiptarëve, me marrëveshjen me FMN-në do t’iu rriten taksa të tjera. Nuk ka lajm më tragjik se ky për qytetarët që do të varfërohen në mënyrën më të pamëshirshme kur të mësojnë se do t’u rriten taksat, mes tyre çmimi i energjisë dhe ujit”, tha z. Berisha.

Ai kërkoi që marrëveshja me FMN të vijë sa më parë në parlament, pasi sipas tij Fondi ”ka përcaktuar një seri kushtesh për qeverinë për shkak të mosbesimit total që ky organizëm ka tek qeveria”.

Ai propozoi modifikimin e rendit të ditës të kalendarit trejavor të Kuvendit, ku së pari të përfshihet marrëveshja me FMN-në, që siç tha Berisha, ‘parashikon rritje të dhjetë taksave dhe ngrirje të rrogave’.

Ndërhyrja e sotme në parlament e z. Berisha u shoqërua me një fjalor tepër të rëndë dhe fyes në adresë të kryeministrit Edi Rama.

Kjo shkaktoi reagimin e fortë të drejtuesit të seancës, kryetarit të Kuvendit, Ilir Meta i cili e këshilloi deputetin Berisha të ruajë etikën në parlament.

‘Aq më tepër sot, tha Meta, kur është dhe Dita Ndërkombëtare e Lumturisë gjithë ato etiketime nuk shkojnë. Ne nga ju presim që të jeni dhe një model i etikës parlamentare për shkak të eksperiencës. Nëse ne bëjmë ndonjë gabim, ju nuk duhet të bëni gabimet tona. Kjo nuk është një shaka e denjë për staturën tuaj”, iu drejtua kryeparlamentari Meta, ish-kryeministrit Sali Berisha.

HermesNews - ©2014

Dërgo me email | Stampo artikullin