13/03/2014 11:19:53

Misteri i Boeing 777

Boeing-u mund të ketë përshkuar qindra kilometra pas kontaktit të fundit me kontrollorët ajrorë, në 1:30 të mëngjesit të së shtunës

WASHINGTON - Avioni Boeing 777 i kompanisë “Malaysia Airlines”, i zhdukur që prej të shtunës, mund të ketë fluturuar për katër orë pas kontaktit të fundit, njoftojnë hetuesit amerikanë të cituar sot nga e përditshmja “Wall Street Journal”, duke iu shtuar përsëri misterit të kësaj zhdukjeje.

Kështu, Boeing-u mund të ketë përshkuar qindra kilometra pas kontaktit të fundit me kontrollorët ajrorë, në 1:30 të mëngjesit të së shtunës (17:30 GMT të së premtes), një orë pasi është nisur nga Kuala Lumpuri drejt Pekinit.

Kontrolli ajror humbi kontaktin me aeroplanin që transportonte 239 pasagjerë mes bregut lindor të Malajzisë dhe jugut të Vietnamit. Hetuesit amerikanë, të cituar duke ruajtur anonimatin, bazohen për këtë në faktin se të dhënat janë transmetuar automatikisht nga motorët Rolls Royce, me të cilët ishte pajisur Boeing-u i zhdukur.

Pra, nëse sistemet e radios mund të jenë ndërprerë me qëllim në bord, ky sistem i transmetimit automatik mund bëjë të mundur zbardhjen e misterit rreth destinacionit të avionit.

"Zyrtarët amerikanë të antiterrorizmit po eksplorojnë pistën sipas të cilës një pilot ose dikush në bord mund ta ketë rrëmbyer avionin për ta dërguar drejt një destinacioni të fshehtë pasi ka shkëputur me qëllim aparatet e komunikimit me radio", njofton Wall Street Journal, që citon një hetues amerikan të ngarkuar me çështjen.

Sipas hetuesve, “avioni mund të jetë rrëmbyer për t’u përdorur më vonë për qëllime të tjera”, vazhdon gazeta. Edhe e përditshmja ”New Scientist” përmend gjithashtu faktin se Rolls Royce-i ka marrë automatikisht dy seri të dhënash të avionit me numër fluturimi MH370 (në nisje dhe në fazën e ngritjes) në qendrën e mbikëqryrjes në kohë reale të motorëve të tij, që ndodhet në Derby, në Britaninë e Madhe.

Kërkimet mbulojnë tashmë rreth 27 000 milje detare (rreth 90 000 kilometra katrorë, ose një hapësirë të barabartë me sipërfaqen e Portugalisë). Dymbëdhjetë kombe, ndër të cilët, Shtetet e Bashkuara të Amerikës, Kina dhe Japonia, marrin pjesë në operacionet e kërkimit ku janë mobilizuar jo më pak se 42 anije dhe 39 avionë.

HermesNews - ©2014

Dërgo me email | Stampo artikullin