10/03/2014 11:53:38

Konkurenca po u merr frymën farmacive në Greqi

Bashkimi Panhelenik i Farmacistëve kundërshton masat që parashikohen të merren nga kreditorët e vendit për të hapur këtë sektor ndaj konkurencës

ATHINË - Farmacistët në të gjithë Greqinë do të fillojnë javën me atë që ata e quajnë një grevë paralajmëruese që do të mbahet sot dhe nesër si protestë ndaj një projekti që synon të liberalizojë këtë sektor, raporton Kathimerini online.

Bashkimi Panhelenik i Farmacistëve i kundërshton masat që parashikohen të merren nga kreditorët e vendit për të hapur këtë sektor ndaj konkurencës duke ndryshuar rregullat aktuale ku farmacistët mund të operojnë sipas një farë lirshmërie, madje duke vendosur vetë se në cilat orare të qëndrojnë hapur.

Bashkimi i Farmacistëve ka përsëritur vazhdimisht se liberalizimi i farmacive do të godasë bizneset e vogla të hapura individualisht nga farmacistët, përballë konkurencës së rrjeteve zinxhir të farmacive të mëdha.

Bashkimi i Farmacisteve deklaroi se kjo protestë që do të mbahet sot dhe nesër është vetëm fillimi i një reagimi ndaj këtyre masave, të cilat, për më tepër, përfshijnë dhe një projekt që të lejojë supermarketet e të gjithë vendit të shesin ilaçe.

HermesNews - ©2014

Dërgo me email | Stampo artikullin