05/03/2014 18:14:28

Mund të zgjatet qëndrimi pa viza në Shqipëri

Shqipëria po punon për të zgjatur sezonin e saj turistik e për rrjedhojë edhe kohëqëndrimin e vizitorëve të huaj pa viza në Shqipëri

TIRANE - Ministrat e Turizmit pjesmarrës në Panairin e Berlinit zhvilluan takimin e 4-t, në kuadër të Programit “Silk Road”. Gjatë takimit u prezantua Raporti mbi Lehtësimin e Proçedurave të Vizave. Ministrja e Zhvillimit Urban dhe Turizmit Eglantina Gjermeni deklaroi se Shqipëria po punon për të zgjatur sezonin e saj turistik e për rrjedhojë edhe kohëqëndrimin e vizitorëve të huaj pa viza në Shqipëri.

Gjatë takimit ministrerial të vendeve anëtare të programit “Silk Road”, u ra dakord që rekomandimet për lehtësimin e proçedurave të vizave të përfshihen në axhendën 2014-2015.

Projekti i lancuar nga Organizata Botërore e Turizmit, “Rruga e Mëndafshtë” si koncept turistik, stimulon shkëmbimet kulturore, tregtare dhe turistike mes 24 shteteve pjesë e programit kryesisht nga Azia dhe Europa.

Ministrja Gjermeni po ndjek Panairin Ndërkombëtar të Turizmit në Berlin, ku Shqipëria prezantohet me stendën e saj, kuruar nga Agjencia Kombëtare e Turizmit. Shqipëria shkon në këtë panair, ndër më të rëndësishmit në Evropë për të promovuar imazhin e ri turistik të vendit. Veç Agjencisë Kombëtare të Turizmit në panair marin pjesë edhe 18 operatorë turistikë, që operojnë në tregun vendas, të cilët po paraqesin ofertat e tyre turistike për turistët gjermanë.

Panairi i Berlinit është një ndër pikëtakimet më të rëndësishme për tur-operatorët, të cilët lidhin kontrata bashkëpunimi me partnerë të huaj. Interesi i turistëve gjermanë për Shqipërinë ka ardhur gjithmonë në rritje, duke e konsideruar Shqipërinë si një destinacion potencial turistik. Të mërkurën, Ministrja e Zhvillimit Urban dhe Turizmit, Eglantina Gjermeni nënshkroi në Berlin marrëveshjen 2-vjeçare të bashkëpunimit me Organizatën Botërore të Turizmit, Agjencinë e specializuar të Kombeve të Bashkuara në fushën e turizmit, përfaqësuar nga sekretari i Përgjithshëm, Taleb Rifai.

Kjo marrëveshje synon rritjen e bashkëpunimit me UNËTO-në me qëllim përmirësimin e aftësisë konkurruese dhe zhvillimin e qëndrueshëm të sektorit të turizmit në Shqipëri. “Shqipëria prezantohet sot me një imazh të ri turistik.

Përmes kësaj marrëveshje, ne angazhohemi të punojmë për të përmirësuar pozicionin e Shqipërisë në tregun ndërkombëtar të turizmit”, deklaroi ministrja Gjermeni. Organizata Botërore e Turizmit do të ofrojë asistencë në tre fusha kryesore, marketingut dhe promovimin, forcimin e kapaciteteve dhe menaxhimin e destinacioneve turistike dhe lehtësimin e procedurave për turistët.

HermesNews - ©2014

Dërgo me email | Stampo artikullin