05/03/2014 16:53:12

Rama pret Giorgio Napolitanon

Në takim u vlerësua roli e kontributi i Shqipërisë në rajon, për të cilin Kryeministri Rama nënvizoi se 100 vjet pas fillimit të Luftës I Botërore, Ballkani jeton një situatë cilësisht të ndryshme

TIRANE - Kryeministri Edi Rama dhe Presidenti i Italisë, Giorgio Napoletano, nënvizuan në takimin e përbashkët sot në selinë qëndrore të Qeverisë se, miqësia mes dy popujve, që i bashkon jo vetëm afërsia gjeografike, por edhe afërsia kulturore dhe interesa të përbashkëta si dy vende fqinje, përbën një bazë të fortë për avancimin e bashkëpunimit dypalësh.

Gjatë bashkëbisedimit me kreun e shtetit italian, të cilin e konsideroi si mik të shqiptarëve, Kryeministri Rama theksoi se mbi këto themele dhe konsiderimin e Italisë një partner kyç, ndërmori disa vizita në Itali, me fokus rritjen e shkëmbimeve tregtare dhe shtimin e investimeve italiane në Shqipëri.

Në takim u vlerësua roli e kontributi i Shqipërisë në rajon, për të cilin Kryeministri Rama nënvizoi se 100 vjet pas fillimit të Luftës I Botërore, Ballkani jeton një situatë cilësisht të ndryshme. Perspektiva e përbashkët europiane e Ballkanit, u shpreh Kryeministri, sot është e qartë dhe më e afërt. Ndonëse, theksoi ai, kjo kërkon edhe marrjen e përgjegjësive të reja përballë sfidave të reja që kanë të bëjnë me zhvillimin e prosperitetin e rajonit.

HermesNews - ©2014

Dërgo me email | Stampo artikullin