04/03/2014 19:12:57

Më pak afër Lulzim Bashës se PDsë

Do doja t’i sugjeroja partisë time që moraliteti është diçka e cila nuk është as demodé as anakronike. Kjo vlen për gjithë klasën politike. Më shumë se kurrë opozita duhet shfaqur me vlera morale, të jetë përfaqësuesi i qytetarëve, të përcjellin integritet për interesat e mëdha kombëtare

HermesNews - Zonja Topalli, keni qenë shumë aktive në Facebook si dhe në Parlament ditët e fundit në mbështetje të protestave të shoferëve të furgonëve. A është ky starti i të bërit opozitë ?

Ndoshta nuk do të isha shumë dakord me ju. Para se të niste sesioni parlamentar kam qenë aktive në “Facebook”, si dhe në jetën parlamentare sepse politika është një pasion, është pjesë e brendshme. Media sociale është kthyer në një fuqi globale, pa dashur të ul vlerën e asaj tradicionale. Në mediat sociale i dëgjon të gjithë. Por, ajo që dashuroj është parlamenti dhe parlamentarizmi.

A është kjo nisja e të bërit opozitë nga ana juaj dhe që paralajmëron se ju personalisht, do të jeni një opozitare e fortë në të ardhmen ?

Unë jam vetja ime dhe funksionoj bashkë brenda një grupi parlamentar dhe mund t’ju them me bindje se është një grup i mirë, është një grup që ka diskutime serioze për tema të ndryshme. Sigurisht që eksperienca e madhe si kryetare e parlamentit më bën të di çdo detaj, të kuptoj çdo veprim, të reagoj për çdo gjë që nuk është ne dakord me ligjin. Thonë që politikani më i mirë është koha edhe kjo është mëse e vërtetë.

LSI e ka ndihmuar në qeverisje Partinë Demokratike, apo e ka dëmtuar ?

Në zgjedhjet e 23 qershorit është shpërblyer një pjesë qeverisjes që ishte në katër vitet e fundit dhe u dëmtua pjesa tjetër e qeverisë që ishte PD. Një gjë pa sens. Rezultati i 23 qershorit vjen si pasojë e disa elementëve: e para konsumimi 8-vjeçar i qeverisjes së djathtë. Pavarësisht se vendi nuk kaloi në recesion, qarkullimi i paktë i parasë si shkak i krizës i vendeve fqinje dhe së treti segmente të caktuara të administratës tonë defektuan gjatë viteve të fundit të qeverisë. Segmente të caktuara të administratës menduan se detyra të caktuara mund të shërbenin në interesa të tyre personale. Pas 23 qershorit, ish-kryeministri Sali Berisha dha dorëheqjen dhe ka përsëritur disa herë: Përgjegjësia është e Sali Berishës dhe vetëm Sali Berishës. Të gjithë ne e dimë që nuk është përgjegjësia e tij. Por e atyre zyrtarëve që pas besimit të Sali Berishës, e përdorën duke mos menduar vetëm për interesat publike.

Por, një pjesë e zyrtarëve sot janë të deleguarit e kryetarit Basha në qytete të Shqipërisë ?

Unë jam Jozefina Topalli, unë nuk jam një tjetër. Unë kam analizën time dhe unë jam vetja ime. Të gjithë atyre u pëlqen thënia dhe amnistimi në qoftë se një burrë shteti mori vetëm për vete për të amnistuar gjithë pjesën e shtetit.

Ju keni përgjegjësi për humbjen e Partisë Demokratike ?

Të gjithë kemi përgjegjësi. Përgjegjësia ime është aq sa përgjegjësia e një parlamentari, që s’ka qenë kurrë në qeveri. Matja e kontributit të çdo individi ka të bëjë me detyrën që ka dhe detyra e Jozefina Topallit ka qenë kryetare e Parlamentit. Sigurisht unë di të mbaj pjesën time të përgjegjësisë. Por do doja t’i sugjeroja partisë time që moraliteti është diçka e cila nuk është as demodé as anakronike. Kjo vlen për gjithë klasën politike. Më shumë se kurrë opozita duhet shfaqur me vlera morale, të jetë përfaqësuesi i qytetarëve, të përcjellin integritet për interesat e mëdha kombëtare.

E keni sulmuar Partinë Socialiste gjatë detyrës tuaj si kryetare e Kuvendit. Ndjeni pendesë apo i qëndroni asaj që keni bërë ?

Mbas Sali Berishës, Jozefina Topalli ka qenë target për tetë vite. Njerëzit bëjnë analizën e tyre. Përtej historisë së imazhit, humbin thelbin dhe substancën. Nuk ka asgjë më të rëndësishme për një kryetar Kuvendi sesa të çojë përpara axhendën e parlamentit dhe parlamentarizmin. Aty Jozefian Topalli ka qenë shumë herë vetëm.

Çdo të thotë vetëm ?

Vetëm, sepse jo gjithmonë kam pasur kryetarin e grupit në detyrën e vet, dhe në këtë kuptim kam dashur të mbroj të tjerët dhe socialistët mund të kishin të drejtë.

Po z. Berisha që merr fjalën 1 orë. A është shkelje e rregullores ?

Jo, nuk është shkelur rregullorja sepse është një praktikë parlamentare e adaptuar nga unë për zotin Ruçi. Sepse Z. Ruçi e ka marrë fjalën në çdo kohë. Aq sa ka dashur. Në kuptimin e kundërshtarit politik unë vlerësoj avokatinë që ai i ka bërë dhe vazhdon i bën Partisë Socialiste. Por z.Meta personalisht, ka shkelur rregulloren. Ajo që ka ndodhur në 20 shkurt në sallën e seanca plenare, duke futur jashtë çdo rregulli, ne shkelje të tetë neneve të rregullores, në shkelje të Kushtetutës, të ligjit për ILDKP. Ai qoftë, që ia lejon vetes. Në 23 vite, kurrë, as Skënder Gjinushi nuk ka guxuar të ndërmarrë një vendim që ka të bëjë me shkeljen e një vendimi të vetë kuvendit të Shqipërisë. Rregullorja e Kuvendit nuk është kot, është Kushtetuta mbi të cilin funksion parlamentarizmi. Nuk ka ndodhur kurrë të mos mblidhet konferenca e kryetareve, te mos respektohen afatet dhe mbi te gjitha mosnjohja e vendimeve te legjislaturës së kaluar se mua më duhet ILDKP për arsye të caktuara. Në bazë të kushtetutës, vetëm Presidenti I Republikës ka të drejtë të propozojë titullarin e ILDKP-së. Ajo që ka ndodhur në 20 shkurt është gjeja me e rende. Dhe përgjegjësia takon Ilir Metës si kryetar i Kuvendit. Ky parlament në gjashtë muajt e fundit është kthyer në noter të qeverisë.

Ku po shkon vendi zonja Topalli ?

Vendi po shkon në një udhëkryq në disa aspekte. Një nga kuajt e betejës opozitare këto ditë është dhe mbrojtja e të nëpunësve të pushuar nga puna. Pra kemi nëpunës të pushuar nga puna për t’u zëvendësuar me të tjerë. Por edhe këta të pushuar nga puna kur janë punësuar kanë zëvendësuar disa të tjerë që edhe ata u pushuan nga puna. A kemi të bëjmë me një cikël zëvendësimesh që kondicionohet nga partia që vjen në pushtet dhe që faktikisht nuk kemi të bëjmë me mbrojtjen reale të nëpunësve të shtetit ? Një person kam hequr nga puna me urdhrin tim kur jam bërë kryetare e Kuvendit dhe ishte drejtoresha e burimeve njerëzore. Por shumë tjerë kam marrë në punë dhe në qoftë se nuk kanë tregu eficencën dhe integritetin e duhur, janë larguar nga puna. Një kam hequr nga puna, të tjerë kanë ndryshuar vendet e punës vetë. Po mund të ketë tre katër raste që kam marrë në punë. Kam shtuar vende pune. Por kjo është tipike e Ilir Metës, që të ikë mbi 30 % e administratës së Kuvendi. Është rast i paprecedente në këto 23 vite.

Në qeverisjen e PD ka pasur me lista 1, 2..100 iknin nga puna ?

Sigurisht që edhe në administratën tonë ka patur problem. Ka pasur segmente që defektonin, edhe duhej patur ndërhyrje. Por te heqësh persona që punojnë prej 20 vitesh në administratë kjo është shumë e rënde. Dhe mos harro që jemi ne 2013 e jo në 2005. Janë vendosur garanci të larta dhe standarde të larta. Por që të marrësh me lista nga 19 veta t’i hedhësh poshtë. Në 2005 nuk ishim vend i NATOS, vend i vizave të liberalizuara.
Nuk ishim vend që ecnim në progres.

Por një vend që është anëtar i NATO-s nuk mund të ndodhë një ngjarje si ajo e 21 Janarit ?

Jam shumë dakord me ju, sepse po të mos ishte 21 Janari, Edi Rama do të bënte më keq se ç’kishte bërë.

Po ju çfarë do të bënit në qoftë se nuk do të ishim vend anëtar i NATO-s ?

Do zbatonim ligjin.

E zbatuat ligjin në 21 Janar ?

Sigurisht.

Po pati katër viktima ?

Pas pesë orësh që u sulmuam me të gjitha format dhe hynë brenda oborrit të kryeministrisë. Asnjë nuk bën pyetjen “Si ka mundësi që të parit që i ndodhi tragjedia, Edi Rama dha urdhrin që të tërhiqeshin?” Është një ngjarje shumë e rëndë.

Si po organizohet Partia Demokratike ? A aspironi të jenë një nga liderët kryesor të PD me zgjedhjet e reja, apo do të jeni një deputete e thjeshtë ?

Mendoj se ka kohë për t’i dhënë përgjigje pyetjes së dytë. Përsa i përket pyetjes së parë, mendoj se Partia Demokratike është një forcë e jashtëzakonshme, e cila duhet të përcjellë jo vetëm në mesazhe, jo vetëm në parlament , jo vetëm ne vendime. Sepse politika flet me vendime, fjalët janë fjalë por vendimet janë vendime. Politikani i aftë, elitar është ai që di të marrë vendime. Që të marrësh vendime duhet të kesh kurajë. Politikani elitar është ai që ka kurajë, integritetin dhe interesin publik mbi interesat e karriges, mbi interesat e pushtetit. Duket sikur është diçka idealiste dhe nuk ka shumë lidhje me Shqipërinë. Por ky është problem ynë kryesor.

A ka krizë morale në Partinë Demokratike ?

Partia Demokratike ka të gjitha mundësitë të bëhet mbartëse e vlerave të moralit e standardit. Kjo forcë e madhe politike që ka në qelizat e saj përveç vokacionit perëndimor, vlerat të mëdha të lirisë, të interesave publike, ka mundësi që në momentet e organizimit të saj të zgjedhë vlerat më të rëndësishme të cilat përcjellin identitetin tonë shqiptar dhe politikat e kësaj force politike si qendër e djathtë. Edhe në artikulim, ne duhet të flasim si një force e qendrës së djathtë. Ne duhet të mbajmë të fuqishëm pozicionin tonë në spektrin politik si një forcë e qendrës së djathtë dhe e djathtë. Dhe si e tillë në i qëndrojmë fuqishëm parimeve tona: shtet i vogël, taksa të ulëta, liberalizim të vizave. Por sigurisht kjo, duke pasur në majë të piramidës integritetin dhe interesin qytetar mbi çdo axhendë personale. Mendoj se PD i ka të gjitha potencialet njerëzore për një organizim dhe energji të jashtëzakonshme brenda saj. Kam pasur shumë dëshirë që proçesi i organizimit të PD të ishte mbyllur në muajin dhjetor. Proçesi është shtyrë.

Përse është shtyrë proçesi ?

Nuk e di. Dhe kjo nuk i bën mirë PD, në situatat ku po jetojmë. Kur ekonomia po rrëshqet drejt rrokullisjes, ku shteti ligjor atakohet dhe është pika më delikate e të gjithë ecurisë së kësaj periudhe. Ku rendi është vetëm tritol dhe drogë, sigurisht që është urgjencë, emergjencë që Partia Demokratike të organizohet me një shpejtësi të madhe në thelbin e saj për të gjetur njerëzit me moral, identitet që i përgjigjen kësaj force politike të jashtëzakonshme.

Cili është mendimi juaj për kryetarin e ri të Partisë Demokratike Z. Basha ?

Z. Lulzim Basha është kryetari i ri i Partisë Demokratike. Është tjetër gjë Partia Demokratike dhe tjetër gjë është kryetari. Berisha është personaliteti që rrëzoi diktaturën. Është presidenti i parë i zgjedhur me zgjedhje të lira, është lideri që u kthye me votë, që udhëhoqi proceset demokratike dhe ishte fryma e Partisë Demokratike.

Ju qatë kur dha dorëheqjen z. Berisha ?

Nuk ka rëndësi. Për demokratët, dorëheqja e z.Berisha ishte më e rëndë se humbja e zgjedhjeve ne 23 Qershor. Këtu mbyllet. Tani jemi në opozitë.

Po ju pyes për z. Basha ?

Z. Basha nuk është Partia Demokratike. Partia Demokratike është shumë më tepër sesa kryetari.

Si po e bën detyrën z. Basha ?

Mendoj se opozita duhet të ketë tre shtylla kryesore.

Z. Topalli si po e bën detyrën Z. Basha ?

Pyetni qytetarët. Unë po ju them sesi duhet bërë opozita. Duhet një betejë e fuqishme në Parlament, një kontakt i përditshëm me qytetarët. Dhe kjo e shoqëruar me protesta, siç thotë edhe z. Basha.

Z. Basha ka caktuar një grup koordinatorësh. A jeni dakord për këtë mënyrë riorganizimi i PD ?

Janë disa faza të riorganizimit të PD-së. Dikujt i pëlqen ta quajnë që kjo është pika zero, por nuk është. Regjistrimi i anëtarësisë nuk bëhet për herë të parë, është diçka pozitive që duhej bërë. PD duhet të riorganizohet për shkak edhe të situatës së rëndë që përjeton vendi sot.

Ju aspironi për të qenë nënkryetare e PD ?

Kjo besoj se nuk ka ndonjë vlerë për dëgjuesit. Ka shumë rëndësi që forca politike kryesore në opozitë të riorganizohet dhe të ngrihet. Politikanët të ngrihen në nivelin e ndërgjegjes politike dhe shoqërore të qytetarit të thjeshtë. Politikanët të reagojnë në shpirtin e qytetarit të thjeshtë. Kjo është themelore në situatën që ndodhet sot ekonomia.

Në këto kushte, ju jeni e mendimit se z. Berisha duhet të kthehet në krye të Partisë Demokratike ?

Z. Berisha ka dhënë dorëheqjen. Unë nuk jam Z. Berisha, por jam Jozefina Topalli. Ai ka qenë i qartë në vendimin e tij, por sot në kushtet e rrokullisjes ekonomike, e rritjes së papunësisë, në kushtet e zbritjes së investimeve, në kushtet kur po mbyllen bizneset, në kushtet e tritolit, të hapjes së kanaleve të drogës nga të gjitha drejtimet, misioni dhe detyra e PD-së është më thelbësore dhe jetësore se asnjëherë tjetër. Vendi është në udhëkryq. Ky është alarm. Kjo është mungesë sigurie, ku askush nuk është i sigurt.

A duhet që për hir të kësaj situate që ju përmendni, PD të bashkëpunojë me qeverisjen ?

Nëse ju mendoni se ne duhet të mbështesim PS në përjashtimin kolektiv që u bëri të gjithë drejtorëve përnjëherë, nuk po them që të gjithë janë të korruptuar po kjo do të thotë t’i hapësh rrugën krimit. Por fakti që janë hapur kanale të drogës është shumë më e rendë se e para. Kjo tregon se pa mbështetjen e policisë, droga nuk mund të kalojë kaq e sigurt në Itali apo Greqi. Por këtu ka një bashkëpunim të fuqishëm të grupeve kriminale me pika të caktuara të qeverisë. Ndodh që politikanë të caktuara të mbështeten në grupe të të fortësh. Për here te parë në një numër kaq të madh janë grupet e të fortëve.

Të fortë ka vetëm mazhoranca ?

Shumica janë në mazhoranca dhe në PD nuk ka dhe nuk janë të njohur si të tillë.

Si është qeverisja e z. Rama në këto 6 muaj e gjysmë ?

Dështim total në çdo aspekt, në çdo fushë.

A është normal fjalori juaj, kur i thatë z. Rama se ai është më i pafytyri ?

Natyrisht që të vërtetat thuhen, e vërteta është që kjo qeverisje është e dështuar. Kanë kaluar 6 muaj. Nuk ka qeverisje që ta nisë me depresion, që të bien të ardhurat, që të rritet deficit, që të rritet krimi. Në tre muajt e fundit të qeverisjes së PS, pasi e rritën borxhin me aktin e parë normativ. Nga 62 % në 68 % kanë paguar trefish në pak në investimet publike sesa ka paguar qeveria e Sali Berishës 1 vit më parë. Përsa i përket rimbursimit të TVSH-së, ka paguar disa milion më pak sesa kishte paguar në të njëjtën periudhë Partia e Sali Berishës. Të kalojmë tek ndihma ekonomike që thonin na keni lënë në borxhe. Ka paguar në përqindje më pak se qeverisja e Sali Berishës. Qeveria Rama e ka çuar në 75 % borxhin.

Çfarë duhet të bëjnë shqiptarët zonja Topalli ?

Shqiptarët po bëjnë më shumë se çfarë një njeri mund të mendojë. Protesta e 20 shkurtit ishte protesta e qytetarëve.

Përse ?

Sepse mbas pesë muaj qeverisjeje nuk mund të ketë kurrë protestë. Po kurrë një qeveri nuk mund të mbledhë kaq shumë pakënaqësi, revoltë.

Por ju ishit organizatoret e protestës ?

Jo, nuk është organizim i Partisë Demokratike. Është reagim i qytetarëve që nuk pranon ketë sjellje nga ana e qeverisë. Partia Demokratike është në organizim për veten e vet.

Përse nuk folët në mitingun e 20 Shkurtit ?

Kjo nuk ka asnjë rendësi. Folën qytetarët. Dhe pjesëmarrja e qytetarëve në miting është një paralajmërim i fortë për qeverinë Rama. Unë uroj që të jenë aq të përgjegjshëm sa të kuptojnë. Qeveria Rama në planin ekonomik, në planin e sigurimi, në planin e integrimit po na çon në një dështim total.

Si po qeveris e majta ?

Ju thashe me lart. Krimi eshte ne rruge, ne Rimini u kapen 2 tone droge dhe

Po Lazaratin e bete ju zonje ?

Une quhem Jozefina Topalli.

Por ju ishit pjese e qeverisjes se PD. Ka një akuza për ju për 70 milionë lekë të reja shpenzime për dieta në Kuvend ?

Të gjitha shpenzimet e Jozefina Topallit, për dietat nuk shkojnë më shumë se 13-17 mijë euro në vit. Edhe kjo shifër që unë ju dhashë mund të jetë e tepruar.

* Intervista është dhënë për gazetarin Roland Qafoku në emisionin Debati në Channel One

HermesNews - ©2014

Dërgo me email | Stampo artikullin