01/03/2014 16:27:11

Një model, (pa i ngjarë askujt) ai shqiptar

nga Doriana Metollari

HermesNews - Ukraina dha sot një sinjal për ndryshime të shpejta që po ndodhin në tavolinat ku luhet për fatet e botës, e cila po shkon drejt një separacioni që globalizimi nuk është në gjëndje ta ndalojë, meqë pati surpriza.

Ajo që askush nuk e priste me kaq prepotencë, Kina pra, u bëri të kuptojë se mund të dalë fare mirë në qëndër të fushës, dhe të marrë prodhimin e gjysmës së planetit, me joshjen që u bën multinacionaleve për paga të ulëta në vend dhe prodhime në sasi marramendëse e cilësi të dëshiruar. Kjo është arsyeja që në Europë më nuk prodhohet, in primis.

Endrrat e Bashkimit Europian për t'i qëndruar afër SHBAsë, po sfumohen nga tensionet antiamerikane nëpër botë dhe zbehja e dëshirës për globalizim, ku Kina po u jep një mësim të mirë të gjithë të mëdhenjve që mendojnë se mund të udhëheqin. Tensionet në botë tregojnë se ndoshta shtetet duan të qeverisin vetë ekonomitë e tyre. Asnjë shtet nuk është i lirë ekonomikisht në një Europë që qeveriset nga bankat gjermane.

Tani le të kthehemi tek modeli shqiptar. Qeveria po përpiqet që si hap të parë të rikthejë besimin tek privatët duke i paguar borxhet që paraardhësit kanë mbledhur, sepse le ta themi paraardhesit kanë ditur të mbledhin borxhe duke mos paguar privatë, dhe nëse ka një fjalë që në fjalorin e qeverisjes së demokratëve rëndon janë tenderat.

Kthehemi tek modeli shqiptar i ekonomisë. Unë nuk e besoj se Shqipëria është në gjëndje të adoptojë një model, por besoj se mund ta studiojë një model në masën e saj, me ekonominë e saj dhe burimet e saj. Në një botë që po tenton ti largohet invadencës së multinacionaleve, Shqipëria mund të luajë farë mirë një rol, ekuilibrues dhe ndërlidhes mes ekonomive europiane, me një sistem fiskal, lehtësi, dhe shërbime. Por ka medoemos nevojë të punojë për kulturën dhe profesionalizmin e shërbimeve të ofruara. Shqipëria sot mund të jetë për Europën një nyjë shumë e mirë, siç është Zvicera, mjafton të shfrytëzojë avantazhet e te qenit i vogël, mes të mëdhenjve.

Nuk flas për largim ndaj Europës dhe as për politika antieuropiane. Nuk është antieuropiane të duash veten dhe të punosh për rritje ekonomike dhe mirëqënien e vendit tënd. Dhe le ta themi hapur, nëse të shkosh në Europë do të thote të shkosh drejt një globalizimi që të thith energjitë, vendimarrjen dhe bën që ekonomia jote të bëhet plastelinë e multinacionaleve, atëherë, mbase jemi shumë më europian se Europa.
Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin