28/02/2014 18:18:59

'Furgonat' sot para kryeministrisë

Policia, do të mbrojmë qytetarët. Kalaja, nuk ikim pa pergjigje pozitive. A mund t'u lihet kohë furgonave për të vënë kushte teknike ?

TIRANE - Siç ishte parashikuar, shoferët e furgonave sot dolën para kryeministrisë për të kërkuar anulimin e vendimit që ndalon shoferët të transportojnë pasagjerë.

Gëzim Kalaja, Kreu i Sindikatave të Pavarura, drejtues i kësaj proteste bëri të ditur se protestuesit nuk do lëviznin nga bulevardi pa marrë një përgjigje pozitive lidhur me kërkesat e tyre nga Kryeministri.

Më parë ka qenë Ministri i Infrastrukturës, Edmond Haxhinasto që tha se ligji do të zbatohet, ndërsa shtoi se kërkesat e protestuesve janë të pabazuara në ligj. "Janë rritur investimet për sigurinë rrugore në buxhet. Kemi një paketë masash ligjore dhe operative. Të përgatisim siç duhet drejtuesin e mjetit, sepse ai është shkaku kryesor i aksidenteve", tha ministri Haxhinasto.

Bashkimi Europian premton se do të rrisë asistencën për të rritur sigurinë rrugore. "Duhet të kuptojmë se siguria dhe promovimi i saj janë qasje mendore, e si të tilla duhen kuptuar", tha ambasadori Sequi, një ditë më parë.

Vendimin, kreu i selisë blu Lulzim Basha e shikon si presion. "Kur mijëra bashkëqytetarë kërcënohen në bukën e gojës, ne nuk mund të rrimë indiferentë", tha ai pas protestes se sotme. "Nuk ka gjë më të pamoralshme në politikë se të përdorësh pushtetin për të traumatizuar vendin," tha ai ne fb.

Policia e tiranës doli sot me një komunikatë për shtyp. "Rreth orës 11:00 kanë tentuar të hynë në Tiranë rreth 110 furgonat, të cilat bllokuan akset kryesore që të çojnë në brendësi të kryeqytetit duke krijuar probleme në qarkullimin rrugor. Me tu evidentuar pikat problematike, efektivët e policisë së Tiranës ndërhynë për të liruar rrugën, siç kërkon edhe ligji. Pikërisht kur kërkuam zbatimin e ligjit hasëm kundërshtinë e drejtuesve të protestës, të cilët vetë pas dy orë diskutimesh ranë dakord të lironin rrugën", tha Ardian Çipa, Drejtor i Policisë së Tiranës.

Ka prej atyre që mendojnë se transportit i duhet lënë kohë që të vendosë garancitë dhe kushtet teknike për t'i shërbyer qytetarëve. Sociologu Artan Fuga mendon se "duhen ndarë furgonat brenda kushteve teknike dhe ata që janë jashtë kushteve teknike. Ata që janë brenda kushteve teknike pse të paguajnë pasojat e atyre që janë pa këto kushte? Edhe avionët bëjnë aksidente, edhe treni bën aksident, edhe anija kozmike bën aksidente. Cfarë do të thotë kjo pastaj! Ata që nuk kanë kushtete teknike t'u jepet një kohë biles edhe një kredi për t'a rregulluar furgonin e tyre," thotë ai. Na ndiqni dhe në Facebook dhe Twitter

Doriana Metollari

Dërgo me email | Stampo artikullin