27/02/2014 17:37:09

Çfarë do të ndodhë me depozitat tuaja bankare ?

Ndryshime që lidhen me sigurimin e depozitave

TIRANE - Skema e sigurimit të depozitave do të rishikohet në kuadër të ndryshimeve ligjore që pritet të propozohen në Kuvend brenda tremujorit të parë të vitit 2014.

Projektligji që rregullon funksionimin dhe administrimin e skemës së sigurimit i është dorëzuar qeverisë shqiptare, pasi i është nënshtruar konsultimeve me FMN dhe Bankën Botërore, Bankën e Shqipërisë dhe grupet e interesit.

P/ligj i ri për sigurimin e depozitave ka qëllim të përmirësojë proçedurat e pranimit të subjekteve në skemë, mirëqeverisjen e Agjencisë, administrimin e mjeteve financiare, por edhe të rrisë autonominë e Agjencisë së sigurimit të depozitave dhe llogaridhënien e saj si institucion publik.

Risi është zgjerimi i bazës së depozituesve që përfitojnë sigurim të depozitave të tyre, si pasojë e përfshirjes në skemë të Shoqërive të Kursim Kreditit. Kjo masë, që nuk u realizua dot përmes ndryshimeve ligjore të vitit 2012, për shkak të mosplotësimit të kushteve teknike nga SHKK-të, synon mbrojtjen financiare të depozituesve të këtyre subjekteve, për të kontribuar më tej në stabilitetin financiar të vendit.

Sipas projektligjit, është parashikuar një nivel mbulimi deri në 1 milion lekë për çdo depozitues në SHKK. ASD vlerëson se ky nivel mbulimi siguron plotësisht mbi 90% të depozituesve të SHKK-ve.

Projektligji i është dërguar për shqyrtim dhe konsultim institucioneve të tjera të lidhura, si dhe Ministrisë së Drejtësisë dhe asaj të Integrimit për të verifikuar përputhshmërinë me direktivat e Bashkimit Europian. Skema e sigurimit të depozitave funksionon në Shqipëri që prej vitit 2002.

Bazuar në këtë skemë, Agjencia e Sigurimit të Depozitave siguron në masën 100% çdo depozitë individuale, deri në shumën prej 2.5 milionë lekë, në çdo bankë që operon në Republikën e Shqipërisë. Kjo shumë mbulon plotësisht pothuajse 95% të individëve depozitues në banka. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin