25/02/2014 09:13:44

Erdogan, tre vjet i përgjuar nga sherbimet sekrete

Sipas mediave telefonatat janë përgjuar me urdhër të policisë ose të prokurorëve të afërt me vëllazërinë e predikuesit mysliman Fethullah Gylen

ANKARA - Mijëra persona janë përgjuar që prej tri vitesh në Turqi, mes së cilëve kryeministri Recep Tayyip Erdogan, kreu i shërbimeve sekrete si dhe mjaft gazetarë, njoftoi sot media. Sipas dy të përditshmeve Yeni Safak dhe Star, telefonatat e këtyre personaliteteve janë përgjuar me urdhër të policisë ose të prokurorëve të afërt me vëllazërinë e predikuesit mysliman Fethullah Gylen, të cilit Erdogani i ka shpallur luftë duke e akuzuar si iniciator i skandalit politiko-financiar të paprecedentë që uli reputacionin e qeverisë së tij. Një prokuror i akuzuar nga ana e gazetarëve në lidhje me këtë çështje ka mohuar në mënyrë kategorike se ka urdhëruar përgjigjet. "Këto akuza janë të pabaza. Asnjë veprim i paligjshëm nuk është urdhëruar", pohoi Adnan Cimen për gazetën Milliyet. Ekzistenca e këtyre përgjimeve u zbulua nga prokurorët e emëruar së fundmi nga qeveria për të marrë drejtimin e hetimeve antikorrupsion mbi origjinën e skandalit, pas një vale spastrimesh në radhët e prokurorëve dhe policëve. E përditshmja ”Star” regjistroi afërsisht 7 000 persona të përgjuar. ”Mes personaliteteve të vënë në shënjestër figurojnë përveç Erdoganit dhe kreut të shërbimeve sekrete turke (MIT) Hakan Fidan, një nga personat e afërt të tij dhe disa ministra, shumë këshilltarë, anëtarë të opozitës, biznesmenë, zyrtarë të OJQ-ve dhe gazetarë”, shkruajnë të dy gazetat. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin