24/02/2014 15:12:34

Shqipëria ndryshon profil ekonomik

Rama në Londër: Jemi larg praktikave europiane. Ja prioritetet tona qeverisëse

TIRANE - Shqipëria do të rishohë modelin e saj ekonomik. Kryeministri Edi Rama tha sot në Forumin rajonal të nivelit të lartë për Investimet në Ballkanin Perëndimor, të organizuar nga BERZH në Londër, se qeveria do të merret ristrukturimin e ekonomisë në vend. Sipas tij, duke qenëse jemi ende shumë larg praktikave europiane, nuk i duhet dhënë më shumë jetë sistemit ekonomik aktual. Ai veçoi si shumë të rëndësishme përgatitjen e terrentit për intestitorët e huaj në Shqipëri si një prej hapave të parë drejt ndryshimit të profilit të ekonomisë.

Rama bëri të ditur se qeveria ka bërë lëvizjet e para në drejtim të riformatimit të modelit ekonomik, por siç tha ai, do bëhet gjithçka është e mundur për të implementuar një model të ri, proces që fillon me zëvëndësimin e disa hallkave. Ai vlerësoi se duhet siguruar dhe opinioni publik se rishikimi i modelit ekonomik, do të konkludojë me rritjen e nivelit ekonomik në vend.

Qëllimi i këtij forumi është që të nxjerrë në pah mundësitë për nxitjen e investimeve të huaja në rajon dhe për një shkëmbim pikëpamjesh për të kapërcyer hendekun midis angazhimit politik dhe projekteve reale rajonale. Në këtë takim marrin pjesë edhe kryeministri i Kosovës, Hashim Thaçi, si dhe krerët e qeverive të Bosnjë-Hercegovinës, Kroacisë, i Republikës së Maqedonisë, Malit të Zi dhe ai i Serbisë.

Kryeministri Edi Rama ka nënshkruar gjatë qëndrimit në Londër me Presidentin e BERZH marrëveshjen për Qeverisje të mirë dhe përmirësim të klimës së biznesit.



Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin