22/02/2014 17:01:06

Heshtja dhe s'ka fajtor

nga Doriana Metollari

HermesNews - Më bën të mendoj pasiguria e njerëzve. Janë të bindur se dikush tani po u merr atë diçkanë që në historinë e shqiptarëve lidhet me komunizmin. Mendojnë se po kthehen pas në kohë, por nuk jam krejt e sigurt. Shteti në Shqipëri përceptohet me frikën. Prandaj pakënaqësia tek njerëzit mund të mbillet shumë kollaj tani.

Kush është mësuar që shteti t'a mbërthejë me taksa, buzëqesh, por ata që nuk i kanë paguar kurrë një taksë shtetit ndezin dritat e kuqe dhe i kundërvihen me armiqësi, sepse përceptohet si e drejtë vetëm ajo që nuk u prek interesin vetjak dhe nuk njohin rregullat e përgjithshme.

Pastaj janë dhe ata që nuk kanë çfarë t'i paguajnë për shkak të nivelit të jetesës që kanë. Këta duhet të konsiderohen urgjentisht nga shteti.

Shiko çfarë bëjnë tatimet: po i marrin mbarë ambulantët dhe po i mbyllin të gjithë ata që nuk paguajnë apo janë pa liçensë, në qëndrat e qyteteve. Inspektorët, që në pjesën më të madhe të tyre nuk kanë lëvizur nga pozicionet, vrapojë të zbatojnë urdhërat e drejtorit dhe të vënë gjoba në një pjesë të mirë dhe pa shkak.

Eshtë shumë i thjeshtë mesazhi që shteti do t'i japë qytetarëve, por i druhem agresivitetit të tij me ata që shkelin një normë sado të vogël. Ndërkohë që në vende të tjera lulëzon informaliteti dhe korrupsioni. Lulëzojnë baret pa liçensë.

Shteti nuk mund të bëjë prepotentin me ata që i besojnë dhe të mbyllë sytë para informalitetit. Sepse informaliteti ekziston.

Prandaj është pak i dhimbshëm ky moment me veprime aktive nga ana e shtetit. Policë rrugor që vënë gjobat sepse dikush ka mbuluar një xham me të zi, ndërsa mbyllin sytë para makinës që u kalon me xhama të zi nga të katër anët (?!). Me kë po tallen ?

Eshtë i rrezikshëm përdorimi i forcës vetëm me më të dobëtit. Apo duan të fillojnë prej këtu ? Nuk e di.

Por ajo çfarë realisht njerëzit mendojnë për këtë situatë, këtë heshtje, këtë kalim të vënies së shtetit, është e përçarë. Pjesa më e madhe janë bërë armiq, pjesa tjetër kuptojnë se është e domosdoshme që dikush të vuajë për të vendosur një ekonomi formale në vend.

Vrasjet e ditëve të fundit, apo larjet e hesapeve, nuk kanë fajtor qeverinë, as policinë. Mbase në këtë situatë është më mirë të mos gjejmë fajtorë. Arben Ristani mes ironive që për mua përfundojnë në kosh nga ana gazetareske, tha diçka që e vlerësoj. Bashkëpunim me të gjithë faktorët. E pra njerëz ju e dini, askush nuk pëlqen të jetë i akuzuar kur bashkëpunon. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin