21/02/2014 13:35:51

Në pritje të një zgjidhjeje teknike

Bushati: ''Kemi gjetur gjuhën e përbashkët në parim për të konsideruar cështjen e toponimeve si një çështje të një karakteri të qartë teknik dhe kjo çështje, përsa na takon do të trajtohet si cështje në përputhje me të drejtën ndërkombëtare''

TIRANE - Shefi i diplomacisë shqiptare, Ditmir Bushati, deklaroi sot se, po shkon drejt zgjidhjes çështja problematike e toponimeve.

Bëhet fjalë për të gjithë ata qytetarë shqiptarë që jetojnë në Greqi, por që pengohen të lëvizin pai kanë në pasaportë vendin e lindjes të shkruar në gjuhën shqipe.

“Kemi gjetur gjuhën e përbashkët në parim për të konsideruar cështjen e toponimeve si një çështje të një karakteri të qartë teknik dhe kjo çështje, përsa na takon do të trajtohet si cështje në përputhje me të drejtën ndërkombëtare”, u shpreh Ministri i Punëve të Jashtme, Ditmir Bushati, gjatë konferencës së përbashkët për shtyp me zv/kryeministrin dhe Ministrin e Punëve të Jashtme të Greqisë, Evangelos Venizelos.

Nga ana e tij, Ministri Venizelos u shpreh se çështja e toponimeve nuk është politike dhe nuk duhet konsideruar e tillë. “Vlerësoj deklaratën e z. Bushati se çështja e toponimeve nuk është politike, nuk ka paragjykime, por ka respekt të madh dypalësh për fqinjësi të mirë dhe zgjidhet teknikisht sipas të drejtës ndërkombëtare, e cila do të na japë një zgjidhje të shpejtë, të plotë dhe të zbatueshme edhe për çështje që kanë të bëjnë me probleme që i takojnë çështjeve tokësore dhe detare”, tha Venizelos.

Ndërsa Ministri Bushati gjatë fjalës së tij falenderoi ministrin Venizelos për qasjen e qartë që Greqia ka për rajonin, çka shquhet në turin gjithëpërfshirës dhe për mesazhet me frymë nga e ardhmja e të gjithë rajonit.Ministri i Jashtem Ditmir Bushati gjate deklarates per shtyp

Ministri i Jashtem Ditmir Bushati gjate deklarates per shtyp Foto Agim Dobi ATSHMinistri Bushati siguroi ministrin Venizelos se, “Shqipëria do të bëjë të gjitha reformat për të kurorëzuar përpjekjet për marrjen e statusit dhe për të ecur me vendosmëri përpara në procesin e marrjes së statusit të vendit kandidat dhe në anëtarësimin e plotë në BE”.

“Vlerësova lart përpjekjet për ta ankoruar rajonin në rrjedhat evropiane”, u shpreh ministri Bushati, duke shtuar se “të dy vendet tona kanë një partneritet strategjik të konfirmuar edhe nga drejtuesit e dy institucioneve më të larta të dy vendeve”.

“Kemi ndarë momente gëzimi dhe vështirësie, por nga ana tjetër ka cështje që ende nuk kanë marrë rrugën e zgjidhjes. Nga takimet qe kemi pasur kemi inventarizuar çështjet që kërkojnë angazhim, ku perspektiva evropiane është çështje kryesore për të çimentuar më tej marrëdhëniet mes dy vendeve”, tha ministri Bushati.

Së dyti, vijoi ministri Bushati, “jam i kënaqur që kemi rënë dakord për të ngritur disa komisione që burojnë nga Traktati i Miqësisë mes dy vendeve tona. Kjo sjell një frymë mirëkuptimi të ndërsjelltë në kuadër të të ardhmes euro-atlantike”.

Së treti, theksoi Bushati, “kemi vendosur në planin e bashkëpunimit bilateral për të vazhduar bisedimet për një proces konsultimesh që mendojmë se do të na çojnë drejt zgjidhjeve të plota për cështje që nuk kanë marrë adresimin e duhur”.

Nga ana e tij, ministri Venizelos falenderoi ministrin Bushati për pritjen dhe për predispozicionin tepër produktiv.

“Në diskutimet që kishim sot me ministrin Bushati dhe dje me Kryeministrin Rama arriëm në rezultate shumë konkrete. Jam këtu në 2 cilësi, si Kryetar i Këshillit të Ministrave të Bashkimit Evropian me rastin e 6 mujorit të presidencës greke të BE-së dhe si Zv/Kryeministër dhe Ministër i Punëve të Jashtme të Greqisë. Kam informuar në takimet dje dhe sot për rezultatet e Presidencës greke dhë të takimeve që kam zhvilluar gjatë turit ballkanik. Jam i kënaqur që ky tur përfundon në Tiranë, me vizitën e dytë që bëj brenda disa muajsh”, tha Venizelos.

Ministri i Jashtëm grek theksoi se “në kuadrin e iniciativës së Adriatikut dhe Jonit, ku Shqipëria ka Presidencën, takova ministrin Bushati dhe ky është takimi i dytë brenda pak ditësh. Edha aty konfirmova se një nga prioritetet e Presidencës greke është që t’i jepet statusi i vendit kandidat Shqipërisë në përfundim të kësaj Presidence”.

Edhe në dhjetor, vijoi Venizelos, “Greqia ishte pro që t’i jepej statusi Shqipërisë, dhe jemi ende pro sepse perspektiva evropiane është një element që na intereson shumë dhe është diçka që lidhet me partneritetin strategjik. Ministrat e Jashtëm të vendeve të BE dhe vendeve të Ballkanit Perëndimor do të takohen në Selanik për axhëndën e Selanikut, që ishte prioritet edhe i Presidencës së mëparshme të Greqisë në vitin 2003”.

Ministri Venizelos theksoi gjithashtu se “në nivel dypalësh ekzistojnë vërtet cështje që ende nuk kanë gjetur zgjidhje. Në këtë kuadër do të punojmë të dyja palët që të mire përdorim Traktatin e Miqësisë dhe Fqinjësisë së Mirë, që është në fuqi. Do ngremë komisione të përbashkëta në sektorë të ndryshëm dhe do t’i japim zgjidhje problemeve që kanë të bëjnë me lëvizjen e lire”.Ministri i Jashtem Ditmir Bushati gjate takimit me delegacionin Grek me ne krye Ministrin e Jashtem te Greqise Venizelos.

“Jemi dy vende aleate në NATO, vende miq, kemi marrëveshje strategjike. Ofrojmë shërbimet tona që Shqipëria të integrohet në BE dhe siguroj se do t’i dorëzoj Presidencës italiane rezultatet më të mira të Presidencës tone”, tha Venizelos. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin