19/02/2014 17:15:11

Të gjithë në shesh kundër varfërisë

Kryetari i Partisë Demokratike në aktivin e degës së Korçës. ''Nesër është dita e bashkimit kundër të keqes''

KORCE - Nga Korça ku mori pjesë në aktivin e PD-së, Lulzim Basha theksoi se ashtu si 23 vjet më parë dhe nesër të rinjtë do të jenë ata që do t’i japin mësimin më të madh dyshes Rama - Meta dhe se shqiptarët nuk e pranojnë mashtrimin dhe nëpërkëmbjen e dinjitetit të tyre. Ndërsa mijëra të rinj po i bashkohen PD-së si shpresa e vetme për të ardhmen e tyre, Lulzim Basha i ka garantuar se PD është dhe do të mbetet garanti i lirisë dhe të drejtave të qytetarëve të fituara 23 vjet më parë.

Kryetari i PD Lulzim Basha u ka bërë thirrje qytetarëve pa dallim bindjesh politike që ndihen të mashtruar dhe të tradhtuar nga kjo qeveri, të bashkohen në marshimin e protestës që nis në orën 14 nga sheshin Skënderbej. Basha theksoi se nesër, qytetarët shqiptarë do të protestojnë kundër varfërisë dhe pasigurisë, papunësisë, arrogancës dhe paligjshmërisë.

"Nesër do të vijnë të gjithë ata që u mashtruan për legalizimeve falas, që u mashtruan për shëndetësi falas, që u mashtruan për 300 mijë vende të reja pune, dhe që shohin se nuk ka asnjë vend të ri pune, por mijëra e mijëra vende pune janë shkatërruar e dhjetëra mijëra të tjera rrezikohen të shkatërrohen nga politikat pa kokë të kësaj qeverie. Ndaj nesër është dita, vendi, mundësia t’i japim paralajmërimin më të fortë me zërin qytetar të korçarëve dhe zërin e të gjithë shqiptarëve të lirë. Ndal sulmin dhe revanshin ndaj lirisë, ndal sulmin dhe revanshin ndaj demokracisë, ndal sulmin dhe revanshin ndaj votës së lirë, ndal sulmin dhe revanshin ndaj institucioneve të pavarura", tha Basha.



Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin