18/02/2014 15:32:00

Inspektim ne hidrokarbure

Kryeministri Edi Rama vizitoi sot zonën hidrokarbure Molisht -Shpirag, ku kompanitë Royall Dutch Shell dhe Petromanas Albania janë duke kryer operacionet e kërkimit të hidrokarbureve

TIRANE - Molisht - Shpirag bëjnë pjesë në bllokun e kërkimit 2-3 dhe në bazë të marrëveshjes hidrokarbure, ka përfunduar faza e parë e kërkimit. Kryeministri Rama vizitoi sot zonën hidrokarbure Molisht - Shpirag. Gjatë kësaj faze ka përfunduar shpimi i pusit Shpiragu-2 ndërsa është në proces shpimi i pusit Molishti-1. Investimi në këtë zonë deri tani kap vlerën e mbi 200 milionë dollarëve ndërsa shpimi për kërkimin e hidrokarbureve shkon afro 3500-4000 metra nën tokë.

Pas shpimit të pusit Shpiragu-2, në tetor-nëntor 2013 u krye testimi, nga ku rezultoi në zbulimin e naftës dhe gazit në sasi te konsiderueshme. Nga drejtuesit e kërkimeve, Kryeministri u informua se aktualisht operacionet hidrokarbure janë përqendruar për përfundimin e shpimit të pusit Molishti-1 dhe se parashikohet edhe shpimi i 3 puseve të tjerë, me investim prej 200 milionë dollarë.

Kërkimet në këtë zonë kanë filluar që në vitin 2001, kur u shpua pusi Shpiragu-1, i cili vërtetoi praninë e hidrokarbureve në strukturën e Shpiragut. Të dyja kompanitë kontraktuese Royall Dutch Shell dhe Petromanas Albania janë kompani të listuara në bursat ndërkombëtare.



Na ndiqni dhe në Facebook dhe Twitter

komunikatë për shtyp

Dërgo me email | Stampo artikullin