18/02/2014 14:08:27

Të pathënat e legalizimeve:përmbyten sportelet nga ankesat e qytetarëve

1680 ankesa në javë nga qytetarët, tek sportelet e legalizimeve. 2013: nga 7800 leje të dhëna në vitin 2013, pjesa dërrmuese e tyre janë korruptive dhe degraduese për zonat e mbrojtura të qyteteve

TIRANE - Drejtori i Përgjithshëm i Agjencisë së Legalizimit, Artan Lame, deklaroi të martën se nga 7800 leje të dhëna në vitin 2013, pjesa dërrmuese e tyre janë korruptive dhe degraduese për zonat e mbrojtura të qyteteve tona.

Lame tha se që kur u hapën 14 sportele për legalizimin, kanë mbërritur të paktën 1680 ankesa në javë nga qytetarët. "Sportelet tona po përmbyten nga një valë e paimagjinueshme ankesash, protestash e denoncimesh për atë çka ka ndodhur në vitin e fundit në legalizime", tha Lame.

Sipas Lamës, administrata e shkuar në 8 vite vetëm ka prodhuar probleme. "E them me përgjegjësi se një pjesë e madhe e 23 mijë lejeve të legalizimeve të dhëna për 6 vjet, nga 300 mijë vetëdeklarime të bëra, janë abuzive, korruptive e dëmprurëse për qytetarin e shtetin", tha Lame.

Sipas tij, janë kryer legalizime në parqe kombëtare, zona të mbrojtura mjedisore, në zona arkeologjike e zona të mbrojtura historike të qyteteve.

"Me sebepin e legalizimit janë shitur sipërfaqe të mëdha trojesh në zona ku nuk kishte asnjë lloj shansi ligjor, ku të kryheshin proçedura ligjore për shitje trualli. Është deformuar në themel ligji për Legalizimet duke iu shitur parcela toke shumë të mëdha personave të veçantë të përzgjedhur", deklaroi Lame.

Ai tha se janë bërë legalizime shtesash objektesh në oborre shkollash, kopshtesh, spitalesh, madje edhe ngjitur me muret e bashkive. Ai informoi se duke filluar që nga ditët e para të janarit, të 14 sportelet e Drejtorive të ALUIZNI-t që mbulojnë të gjithë territorin e Republikës, kanë filluar kryerjen e procedurave për legalizimin e objekteve. Duke filluar nga 1 shkurti, grupet e ngritura te punes kanë filluar daljen në terren për përgatitjen e dokumentacionit për legalizim drejtpërdrejt pranë qytetarëve.

"Janë përfshirë zyrtarë të shumë institucioneve, bashkive dhe komunave, notere që vulosnin deklarata false, punonjës hipotekash e monumentesh kulture", theksoi Lame.

Për disa prej legalizimeve abuzive të dhëna në kryeqytet, Lame akuzoi edhe disa punonjës të Bashkisë së Tiranës si përgjegjës. Sipas tij, për rastet më flagrante, ALUIZNI do të dërgojë dosjet në Prokurori. Që të frenohet rrënimi i mëtejshëm, Lame u shpreh se janë larguar nga puna krerët e ALUIZNI-t në rrethe, e punonjës të tjerë, të cilët PD do t’i rikthejë në punë.

"Kjo është lista me emra që na kërkojnë t’i kthejmë në punë. Le të thonë ata që po pregatisin mitingjet, cilin duan të rikthejnë në punë, por janë me mijëra qytetarët që iu dridhet mishi për ato që kanë hequr në vite nga këta punonjës", tha Lame duke i cilësuar të drejta vendimet për t’i larguar nga detyra.

Kreu i ALUIZNI-t tha se lejet e dhëna për legalizim, të cilat nuk janë hipotekuar është rënë dakord me Hipotekën që të rishikohen nga pikëpamja urbane. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin