18/02/2014 12:13:34

Furgonat: luftojmë monopolet ! Kemi liçensë

Ministria, zbatojmë ligjin ekzistues; ''8+1'' nuk mund të marrin pasagjerë në kthim, ligji e ndalon. Uniformave blu, zbatoni ligjin. Autobuzat pa nivel. Nuk japin bileta dhe ndalojnë në çdo 15 minuta. Standarti i shërbimit dhe kushtet teknike ? E lëmë më mirë...

TIRANE - Shoferët e furgonave protestojnë, sepse nuk kanë punë. Protesta e tyre nga njëra anë justifikohet me moralin, nga ana tjetër bie në kundërshtim me ligjin, ekzistues në viteve.

Sindikata e furgonave 8+1, është kundër ndalimit që i është bërë dhe ka kërkuar të hiqet urdhri i kthimit të furgonave pa pasagjerë, çfarë ka penalizuar rëndë shoferët, por ata nuk do të lejojnë që ministrat të bëjnë monopole. Të luftohet informaliteti, por jo mjetet e liçensuara, thonë.

Llogjika që ka ndjekur ministria është ajo e zbatimit të një ligji ekzistues. "Kjo qeveri nuk ka nxjerrë asnjë vendim që po ndalon taksitë. Qeveria po kërkon vetëm të zbatohet ligji që ka 14 vite që shkelet. Taksitë të punojnë sipas rregullave, për të cilat janë liçensuar. Furgonët-taksi të transportojnë udhëtarë sipas rregullave", tha zv. Ministri i Transporteve, Ylli Manjani.

Policia e Shtetit i kërkon uniformave blu të zbatojnë ligjin dhe të ruajnë sigurinë e trafikut rrugor.

"Në nenin 37 të ligjit nr.8308, datë 18.02.1998 Për Transportet Rrugore, i ndryshuar, është përcaktuar që transporti i udhëtarëve me taksi në linjë të rregullt është i ndaluar. Mjeti taksi, kur kryen shërbim jashtë territorit të rrethit ku është regjistruar, në kthim mund të marrë udhëtarë vetëm në rrethin e regjistrimit të tij. Për shkelje të kësaj dispozite, Kodi Rrugor (neni 85 pika 3) parashikon përveç masës me gjobë, tërheqje të lejes së qarkullimit dhe konfiskim të mjetit. Sipas nenit 86 pika 6 të Kodit Rrugor, shërbimi në linjë me një mjet që nuk është i caktuar për një shërbim të tillë, siç është rasti me mjetet 8+1, është i ndaluar", thuhet në komunikatën e tyre,

Mjetet për transport udhëtarësh me numër vendesh mbi 8+1, klasifikohen autobusë dhe leja e transportit për autobusë mund t’u lëshohet vetëm enteve publike, sipërmarrësve (shoqëritë e transportit që në aktet e themelimit, kanë objektin e veprimtarisë transportin e udhëtarëve).

Furgonat me numër vendesh mbi 8+1, nuk përfshihen në kategorinë e mjeteve të licencuara si taksi (pra nuk duhet të mbajnë targë të verdhë) dhe i nënshtrohen një tjetër regjimi juridik lidhur me licencimin dhe transportin e udhëtarëve, pavarësisht se nga media cilësohen furgonë, thotë policia.

Mjetet mbi 8+1 kanë tjetër klasifikim dhe licencohen për transport udhëtarësh, por jo për taksi.

Në këtë boshllëk trafiku me akuza dhe protesta, të fituarit, në dukje, janë autobusat, të cilët hoqen nga rruga një rival informal, por problemi me ta janë kushtet jo të përshtatshme, shërbimi, aspak mirë, biletat që nuk i jepen kurrë në dorë pasagjerit dhe ndalesat çdo 15 minuta që bëjnë rrugës nga një qytet në tjetrin, për të bërë plus dhe shërbimin e pakove që i japin në nisje qytetarë.

Prandaj, nuk bëhet fjalë për t'a gjetur informalitetin tek njeri apo tjetri, sepse në të gjithë krahët policia dhe ministria është përballë një informaliteti që nuk është nxjerrë asnjëherë në dukje kaq hapur. Pyetja është si dhe kur do të zëvendësohet ky kaos, me pritshmëritë e qytetarëve, pra me një transport dinjitoz ? //HermesNews - ©2014// Na ndiqni dhe në Facebook dhe Twitter

Doriana Metollari

Dërgo me email | Stampo artikullin