16/02/2014 13:14:37

Përse dështojnë martesat sipas kishës?

Sipas kishës shkaku kryesor i ndarjes dhe anullimit të martesës nga shumë çifte është varja psikologjike nga prindërit

HermesNews - Sipas kishës shkaku kryesor i ndarjes dhe anullimit të martesës nga shumë çifte është varja psikologjike nga prindërit. Në momentin që çdo vendim i çiftit varet nga miratimi i prindërve, atëherë bashkëshorti apo bashkëshortja kthehen në zëvendës, ndërsa prindërit zënë vendin e “partnerit” të vërtetë në martesë.

“Djem mamaje” apo “vajza mamaje” janë faktorët kryesorë pse shumë martesa anullohen sipas gjykatës kishtare në Liguria të Italisë. Kur prindërit hyjnë në mes, çifti shpërthen.
Nga ana tjetër kisha nuk humb rastin të përcaktojë se pjesa më e madhe e devijimeve me karakter seksual i detyrohen pikërisht rregullave të jetës që janë ndjekur që nga adoleshenca. Si rrjedhim varja e tepërt nga prindërit shkakton edhe devijime seksuale. Nëse e thote kisha…

Një arsye tjetër pse, sipas klerikëve, përfundojnë shumë martesa është edhe mungesa e punës dhe paaftësia për të mbajtur një familje. Riformat e para që duhet të ndërmarrin qeveritë janë punësimi i të rinjve dhe garantimi i një stabiliteti dinjitoz. Shumë të rinj janë të papunë, si rrjedhim varen nga prindërit dhe s’janë të zotët të ndërtojnë një familje të pavarur.

Gjykata kishtare në Liguria gjatë vitit 2013 ka marrë plot 114 kërkesa për anullim martese.
Sipas tyre, shumë të rinj janë të papërgatitur për jetën dhe ndërmarrin hapa tepër të mëdha siç është martesa pa menduar për pasojat. Dështimi i një martese sjell dëme të shumta morale, por jo vetëm. Shumë të rinj, të cilët nuk gëzojnë ende një stabilitet të qëndrueshëm në jetë, ndërmarrin hapin e martesës pa ditur se çfarë do u duhet të përballojnë. Të papërgatitur për jetën dhe të papjekur psikologjikisht i quan gjykata kishtare të rinjtë e ditëve të sotme.

Daniela Vathi

Dërgo me email | Stampo artikullin