06/02/2014 12:54:53

''Tempesta'', jepet arrest me burg për Eugen Çaushajn

I akuzuari për trafik dhe prostitucion ka mohuar të gjitha akuzat ndaj tij. Ai u arrestua gjatë operacionit të koduar ''Tempesta''

TIRANË - Gjykata e Krimeve të Rënda dha sot masën e sigurisë, së "arrestit me burg" për Eugen Çaushajn, i cili akuzohet për trafikim femrash me qëllim prostitucioni dhe trafikim të lëndëve narkotike. Gjatë seancës së zhvilluar sot, trupi gjykues, mbështetur në aktet proceduriale të prokurorisë, vendosi izolimin në paraburgim të të dyshuarit Çaushaj.

Agron Kalemi, avokati i Çaushajt, ka mohuar para trupit gjykues akuzat ndaj klientit të tij, duke i quajtur si të pabaza në lidhje me faktet. 30-vjeçari Çaushaj u arrestua pak ditë më parë gjatë operacionit "Tempesta", të Policisë së Shtetit, për llogari të drejtesisë Italiane.

Gjate operacionit ndërkombëtar "Tempesta", u arrestuan disa persona në Shqipëri dhe Itali si pjesë e një rrjeti të trafikut të narkotikëve dhe femrave për prostitucion.

Sipas policisë, të arrestuarit dyshohet se janë pjesë e dy organizatave kriminale të lidhura me njëra -tjetrën, ajo e Milanos, e cila merrej me trafikun e femrave për prostitucion dhe ajo e Firences, e cila merrej me shpërndarjen e narkotikëve. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin