05/02/2014 17:17:49

Hetime mjekëve për dosjet me diagnoza

Zbulohen dosje individësh për të cilat janë vendosur diagnoza nga më të ndryshmet, nga ato kronike deri tek më të rëndat, ndërkohë që në realitet personat nuk vuajnë nga asnjë sëmundje

TIRANË - Nga inspektimet e Shërbimit Social Shtetëror, në shumë rrethe të vendit janë konstatuar dosje individësh për të cilat janë vendosur diagnoza nga më të ndryshmet, nga ato kronike deri tek më të rëndat, ndërkohë që në realitet personat nuk vuajnë nga asnjë sëmundje. Duke u nisur nga ky shqetësim, zv/ Ministrja e Mirëqënies Sociale dhe Rinisë, Bardhylka Kospiri, ka propozuar se për abuzimet që bëhen në komisionet mjeko ligjore të merren masa deri në heqjen e licencës.

Aktualisht MMSR po evidenton rast pas rasti të gjitha abuzimet që janë bërë nga mjekë të ndryshëm. Në bashkëpunim dhe me Urdhërin e Mjekut do të diskutohet dhe për rritjen e masave penalizuese ndaj atyre që abuzojnë me vendimet për dhënien e pensionit të invaliditetit.

Sipas zv /Ministres Kospiri , ”duhet të rritet gjoba në masën 80% dhe gjithashtu të bëhet dhe pezullimi i të drejtës së profesionit për një periudhë kohore, rreth 3 apo për 5 vite”.

Shërbimi Social Shtetëror dhe Ministria e Mirëqënies Sociale vazhdon kontrollet e skemës së Ndihmës Ekonomike dhe Pagesave të Aftësisë së Kufizuar. Gjatë muajve të fundit këto institucione kanë kallëzuar në prokurori abuzuesit e skemës së ndihmës ekonomike dhe pagesave të paaftësisë në disa prej komunave në vend.

Abuzimet që janë bërë në komisionet mjeko - ligjore nga bluzat e bardha e dëshmon edhe skema e fryrë e ndihmës ekonomike me njerëz që nuk plotësojnë asnjë kriter ligjor. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin