05/02/2014 17:13:22

Hetime për kreditë e buta të zyrtarëve

Zyrtarë të lartë dhe funksionarë politikë kanë përfituar një kredi të dytë për të blerë banesë jashtë vendit të ushtrimit të detyrës, madje dhe në zona turistike

TIRANE - Deklaratë e Ministres së Zhvillimit Urban dhe Turizmit EglantinaGjermeni, pas mbledhjes së Këshillit të Ministrave :

Qeveria sot ka miratuar vendimin për shfuqizimin e VKM-së nr.600 për trajtimin me strehim të nëpunësve civil të administratës së lartë shtetërore dhe funksionarëve politikë.

Në fakt, siç kemi bërë të njohur në media, Auditimi i kryer nga Ministria e Zhvillimit Urban dhe Turizmit zbuloi fakte tronditëse. Programi i kredive të lehtësuara për zyrtarët dhe funksionarët politikë u përdor për të mbështetur militantët dhe njerëzit me pushtet rreth qeverisë, në mënyrë të njëanshme, duke mos adresuar problemet e qytetarëve më në nevojë për strehim dhe me të ardhura të ulëta.

Raporti i auditimit të brendshëm të Ministrisë, dëshmoi se zyrtarë kanë përfituar kredi pa plotësuar asnjë lloj kriteri. Konkretisht:

- Janë akorduar dhe lidhur kredi lehtësuese me nivelin maksimal të përfitimit, duke mos bërë asnjë përllogaritje.

- Janë evidentuar raste të përfitimit të kredive lehtësuese nga 2 programe të strehimit njëkohësisht.

- Janë gjetur raste të trajtimit me kredi për shtëpi të funksionarëve që kanë në pronësi 1 ose 2 shtëpi.

- Zyrtarë të lartë dhe funksionarë politikë kanë përfituar një kredi të dytë për të blerë banesë jashtë vendit të ushtrimit të detyrës, madje dhe në zona turistike.

Të gjitha këto shkelje, materialet për të cilat i kanë kaluar për hetim prokurorisë, dëshmojnë qartë se zyrtarët e veshur me pushtet janë trajtuar ndryshe nga qytetarët në nevojë, janë privilegjuar në kundërshtim me ligjet në fuqi.

Këshilli i Ministrave me propozim të Ministrisë së Zhvillimit Urban dhe Turizmit vendosi sot të mos trajtojë më në mënyrë të privilegjuar zyrtarët e shtetit.

Vendimi i sotëm i Këshillit të Ministrave parashikon që fondet e planifikuara në buxhetin e shtetit për zyrtarët, të alokohen në kategoritë e tjera më në nevojë për strehim, siç janë familjet që banojnë në ish pronë të subjekteve të shpronësuara të cilët përfitojnë kredi me 0 % interes.

Vendimi i sotëm i Këshillit të Ministrave i heq zyrtarëve të lartë të shtetit mundësinë për t'u trajtuar në mënyrë të privilegjuar, përmes kredive te buta per strehim. Falëvendimit të sotëm, privilegjet e trajtimit me kredi të buta do të kalojnë nga zyrtarët e lartë të shtetit, tek qytetarët që kanë më shumë nevojë për këtë strehim. //Deklaratë për mediat e Ministres së Zhvillimit Urban dhe Turizmit/ /Na ndiqni dhe në Facebook dhe Twitter

Eglantina Gjermeni

Dërgo me email | Stampo artikullin