31/01/2014 16:25:50

Duhani: banorët në protesta

Prodhuesve nuk u shitet duhani

ELBASAN - Banorët e zonës së Dumresë protestuan sot për shkak të mbetjes stok të prodhimit të duhanit. Sipas banorëve, firma greke “Mika Korça”, që blen duhanin e zonës, nuk ka respektuar kontratën me prodhuesit, duke lënë kështu në mëshirë të fatit prodhimin e siguruar nga të paktën dy mijë familje që merren me kultivimin e duhanit.

Sipas banorëve, “çmimi nga 350 – 450 lekë/kg që tregtohej më parë është ulur në 200 lekë, por edhe me këtë çmim firma ende nuk ka ardhur të blejë prodhimin, duke lënë stok një sasi të madhe duhani, me të ardhurat e të cilit jetojnë banorët e zonës”.

Në këtë kuadër, banorët kërkojnë ndërhyrjen e autoriteteve për zgjidhjen e kësaj situate.

Fatmir Tafani, i cili kultivon duhanin prej shumë vitesh, bëri të ditur se “është nëshkruar një kontratë mes nesh dhe firmës që këta të fundit ta blejnë duhanin, edhe pse çmimi është ulur, ne sërisht kemi pranuar pasi me të jetojmë, na ka mbetur duhani stok pasi për shkak të kontratës që kemi lidhur nuk e kemi shituar atë individualisht. Firma duhet të jetë korrekte dhe të vijë të mbledhë duhanin në bazë të kontratës së lidhur mes nesh, pasi janë shumë familje që jetojnë me këtë tregti”.
Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin