31/01/2014 16:16:19

Menaxhimi i banesave sociale dhe kushti i pestë i integrimit

Riaktivizimi dhe takimi i Grupit Ndërministror për Çështjet e Përfshirjes së komunitetit Rom dhe Egjyptian ka për qëllim të ndjekë me vëmendje të veçantë Rekomandimet e Progres Raportit

TIRANË - “Ato njësi vendore që nuk arrijnë t’i menaxhojnë si duhet çështjet e banesave sociale apo fëmijët e rrugës, do t’u rishikohen kompetencat”, paralajmëroi sot Ministri i Mirëqenies Sociale dhe Rinisë, Erion Veliaj, në mbledhjen e Këshillit Ndërministror për Dekadën Rome.

Ky këshill mblidhet dy herë në vit, por kjo ishte hera e parë e riaktivizimit të tij pas një periudhe 1 vjeçare. Riaktivizimi dhe takimi i Grupit Ndërministror për Çështjet e Përfshirjes së komunitetit Rom dhe Egjyptian ka për qëllim të ndjekë me vëmendje të veçantë Rekomandimet e Progres Raportit – REKOMANDIMIN 5, si dhe Rekomandimet dhe Planin e Veprimit për Dekadën Rome.

Në mbledhjen e Këshillit Ndërministror, i cili u kryesua nga Ministri i MSR-së, Veliaj, morën pjesë zëvendësministrat e ministrisë së Brendshme, ministrisë së Arsimit, Shëndetësisë, Punëve të Jashtme, Integrimit Evropian, Zhvillimit Urban dhe Turizmit dhe ministria e Transportit, si dhe përfaqësues të Avokatit të Popullit.

“Refuzoj të pranoj se jetojmë në një vend ku njësi të pushtetit vendor si Bashkia e Tiranës, nuk menaxhojnë dot një bulevard kur bëhet fjalë për çështjen e fëmijëve të rrugës. Refuzoj të pranoj se jetojmë në një vend i cili synon statusin e kandidat për t’iu bashkuar BE-së, por nuk menaxhon dot 450 banesa sociale. Ajo që ndodh në Tiranë apo në bashki e komuna të tjera të vendit, është një shfaqje e shëmtuar”, deklaroi Veliaj.

Sipas tij, në rastet kur njësitë vendore nuk menaxhojnë dot çështjen e fëmijëve të rrugës apo strehimin dhe banesat sociale, ky ndërministerial do të ndërhyjë me vendimet e tij. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin