30/01/2014 11:48:29

Kriza përtej korrupsionit dhe shpërdorimt të detyrës

Kriza ekonomike që ka përfshirë shtetin fqinj, Italinë, dhe tentativat për të dalë prej saj kanë shtuar së fundmi rreptësisht investigimet për korrupsion, vjedhje dhe shpërdorim të detyrës

ROME - Kriza ekonomike që ka përfshirë shtetin fqinj, Italinë, dhe tentativat për të dalë prej saj kanë shtuar së fundmi rreptësisht investigimet për korrupsion, vjedhje dhe shpërdorim të detyrës. Një rast konkret është ai i rajonit të Abruzzo-s (Abruco) ku rreth 24 persona të administratës u detyruan të përballen me ligjin për vjedhje dhe shpërdorim të fondeve publike.

Ndër të tjerë është përfshirë edhe governatori i rajonit Abruzzo, Gianni Chiodi, i cili përveç akuzave për vjedhje dhe korrupsion, do të përballet edhe me akuza për favoritizëm personal ndaj një vajze me të cilën u gjet në një hotel të Romës dy vite më parë dhe krejt papritur kurrikulumi i saj u preferua ndaj 22 konkuruesve të tjerë për një vend pune në administratë me emërim të drejtpërdrejtë nga Ministria e Punës.

Chiodi vazhdon të përsërisë gjatë intervistave se mes tyre kishte thjesht një lidhje tre vite më parë, por ai nuk ka kryer kurrë favoritizma ndaj saj dhe askujt tjetër duke theksuar ndershmërinë dhe korrektesën me të cilën i është kushtuar detyrës së tij. Pas akuzave, i duhet gjithashtu të mbajë të bashkuar familjen e tij dhe pranon se lidhja ka qenë një gabim apo një dobësi njerëzore për të cilën i duhet të paguajë padrejtësisht si në karrierë ashtu edhe në familje.

Sipas tij, këto akuza të padrejta kanë si qëllim përjashtimin e tij nga zgjedhjet e 25 marsit në Abruzzo. “Të mos krijojnë iluzione të kota armiqtë e mi politikë. Do të jetë populli përmes votës ai që do të më thotë nëse duhet të largohem nga politika..”- shprehet Chiodi.

Gjithsesi Chiodi nuk është i vetmi i akuzuar për shpërdorim të fondeve në rajonin e Abruzzo-s, drejtësia mesa duket ka trokitur edhe në dyert e shefave të tjerë të rajonit si ai i shëndetësisë, i turizmit, i bujqësisë etj. Të gjithë të qendrës së djathtë.

Lista pafund hotelesh me pesë yje, udhëtimesh transoqeanike, gra, të dashura, dashnore shpenzime pa kriter, të gjitha këto në llogarinë e rajonit të Abruzzos dhe mbi kurriz të qytetarëve, të cilëve u tkurren shërbimet. Mbase koncepti i shpërdorimit të detyrës nuk është i qartë për të gjithë, veçanërisht në një Itali që po shkon drejt rrënimit ekonomik, ai moral është tejkaluar tashmë.

Të mos harrojmë këtu rastin që bëri bujë pak kohë më parë: kontrata e shkruar e një zyrtari me sekretaren e tij, së cilës i kërkohej të flinte me të katër herë në muaj natyrisht pas shpërblimeve bujare.

Daniela Vathi

Dërgo me email | Stampo artikullin