26/01/2014 12:57:45

Snowden: kthimi në Shtetet e Bashkuara i pamundur

Snowden është shprehur se nuk do të kthehet më në Shtetet e Bashkuara derisa të kenë ndryshuar ligjet

HermesNews- Snowden është shprehur se nuk do të kthehet më në Shtetet e Bashkuara derisa të kenë ndryshuar ligjet, pasi i duhet të përballet me akuza të rënda për spiunazh dhe vjedhje të sekreteve shtetërore. Gjatë një interviste në CNN ai shpjegoi se ligji amerikan nuk e mbron për aktet që ka kryer, ndaj është i detyruar të mos kthehet.

Nga qershori ai është i strehuar në Rusi duke krijuar kështu mosmarrëveshje mes dy vendeve. Gjatë qëndrimit të tij në Rusi, Snowden ka dhënë shpesh intervista dhe informacione zakonisht online për gazetarët dhe janë të shumtë ata që mbështesin kauzën e tij.

Nga ana tjetër, Shtetet e Bashkuara nuk kanë qëndruar në heshtje në lidhje me këtë çështje. Mëshira as nuk merret në konsideratë në këtë rast- komentoi gjenerali amerikan Eric Holder.

Publikimi i informacioneve sekrete nga Snowden ka shkaktuar mosmarrëveshje dhe aksidente diplomatike në Shtetet e Bashkuara dhe në lidhje me marrëdhëniet e tyre ndërkombëtare. Snowden si rrjedhojë duhet të përballet me drejtësinë amerikane e cila parashikon ligje mjaft të rrepta në raste të tilla.

Në intervistën e fundit online, Snowden vazhdoi t’i mbahej idesë se jo çdo lloj spiunimi është negativ. Sipas tij, shteti përfiton biliona dollarë duke cënuar privatësinë e qytetarëve, duke qenë se teknologjitë e reja e bëjnë të mundur dhe të lehtë përgjimin çdo ditë e më shumë.

Daniela Vathi

Dërgo me email | Stampo artikullin