24/01/2014 12:46:15

NASA: Diçka e çuditshme po ndodh me Diellin

Ekspertët e Nasa-s bëjnë të ditur se diçka e papritur po ndodh me Diellin

NASA - “Aktiviteti i Diellit është në minimumin e tij në 100 vitet e fundit”- thonë ekspertetët duke shpjeguar se kushtet në të cilat ndodhet aktualisht Dielli përngjasojnë më së shumti me një dukuri e njohur si “minimumi i Maunder-it”, emër me të cilin njihet periudha që shkon nga 1645 deri me 1715 ku aktiviteti diellor arriti në nivele shumë të ulëta. Astronomët vunë re rreth vetëm 50 njolla diellore, ndërkohë që zakonisht shifrat shkojnë nga 40.000 deri në 50.000. Ishte pikërisht në atë periudhë dhe për të tilla arsye kur ngriu akull lumi Tamiz në Londër.

Hulumtuesit mendojnë se “dembelizmi” i Diellit në aktivitetin e rregullt diellor mund të shkaktojë dëme të mëdha për njerëzimin dhe se gjithashtu ka rreth 20% mundësi që kjo të sjellë ndryshime të ndjeshme në temperaturë dhe klimë. Si rrjedhojë mund të kemi dimër më të ftohtë të ngjashëm me atë të periudhës së “minimumit të Maunder-it”.

Studiues të tjerë, si Lucie Green nga University College London, besojnë se këtë herë gjërat mund të shkojnë ndryshe për shkakt të aktivitetit të dendur njerëzor, por pasojat konkrete janë ende të panjohura.

Dikush tjetër shprehet se kjo gjendje mangësie në aktivitetin diellor mund të ndikojë tek sistemet meteorologjike dhe ka mundësi që brënda 40 vjetësh Toka të gjendet në të njejtën situatë të “minimumit të Maunder-it”. Vitin e shkuar Nasa pati paralajmëruar se diçka e papritur dhe e çuditshme po ndodh me Diellin.

Sipas rregullit të ciklit diellor njëmbëdhjetëvjeçar, ky vit duhet të ishte viti i maksimumit të aktivitetit diellor. Numri i njollave diellore, të cilat zakonisht shtohen gjatë periudhës maksimale të ciklit, është ende shumë i vogël dhe ngurron të rritet që nga viti 2011. Gjithashtu ndriçimet diellore kanë qenë jo të zakonshme. Janë të shumtë ata që pyesin nëse Nasa ka gabuar apo vërtetë aktiviteti diellor është në minimumin e tij ndërkohë që duhet të ishte në pikën maksimale këtë vit, siç tregon edhe mungesa e njollave diellore.

Ndërkohë shkencëtarë astronom si Dean Pesnell e të tjerë kanë dhënë shpjegime të ndryshme për dukurinë që po përfshin yllin tonë, pa të cilin jeta në Tokë do të ishte e pamundur. Sipas tyre nuk bëhet fjalë për minimumin, vazhdojmë të jemi në maksimumin e ciklit diellor, por këtë herë situata është ndryshe për shkak se nivelet maksimale janë të dyfishta, pra aktiviteti diellor ka arritur dy herë brënda së njëjtës periudhe pikën maksimale të tij.

Diçka e ngjashme, sipas studiuesve, ka ndodhur edhe në periudhën mes viteve 1989-2001. Nëse vërtetë dy ciklet në fjalë janë të ngjashëm, kjo do të thotë se pika maksimale e aktivitetit diellor parashikohet të jetë në fund të 2013-ës dhe tjetri në 2015-ën. Na ndiqni dhe në Facebook dhe Twitter

Daniela Vathi

Dërgo me email | Stampo artikullin