23/01/2014 16:23:29

Shtese ne buxhetin e vitit 2013

Akti normativ parashikon një shtesë fondesh prej 4.9 miliardë lekësh

TIRANE - Kuvendi miratoi të enjten në seancë plenare Aktin Normativ “Për disa ndryshime në ligjin nr.119/2012, “Për buxhetin e vitit 2013”, të ndryshuar”.

Opozita para se të niste debati për këtë Akt braktisi punimet e seancës plenare. Akti normativ parashikon një shtesë fondesh prej 4.9 miliardë lekësh.

Sipas Aktit Normativ, ministrisë së Mirëqënies Sociale dhe Rinisë i alokohet fondi prej 1.9 miliardë lekësh në programin buxhetor “Mbrojtja sociale” me qëllim kryerjen e pagesës së PAK-së dhe ndihmës ekonomike për muajin dhjetor, ndërsa ministrisë së Transportit dhe Infrastrukturës i shtohen 3 miliardë lekë në programin buxhetor “Transporti rrugor”.

Deputeti Ervin Koçi tha se ndryshimet e buxhetit përmes aktit normativ erdhën si rrjedhojë e rritjes së të ardhurave në buxhetin e shtetit deri në fund të vitit 2013.

“Maxhoranca e djeshme fliste për buxhetin më të madh të historisë së Shqipërisë, dhe për një Shqipëri që po lulëzonte në kohë krize botërore, por ne i kërkuam të miratonte një buxhet realist”, tha Koçi.

Sipas tij, kur ata u larguan nga zyra të ardhurat në buxhet ishin 4 % më pak se në vitin 2012, duke lënë financat e vendit në gjendje kotastrofike. Për këtë, vijoi Koci, ne u detyruam të hartonim një Akt Normativ për të bërë të mundur që shteti të ofronte shërbimet bazë.

Deputeti Anastas Angjeli tha se Akti Normativ plotëson të gjitha kushtet si në aspektin ligjor, ashtu edhe në aspektin e realizmit të paraqitjes, në aspektin e përgjegjshmërisë. “E vetmja papërgjegjshmëri është papërgjeshmëria e parashikimit të të ardhurave në buxhet nga maxhoranca e djeshme”, tha Angjeli Qeveria përmes nëj Akti Normativ kreu rishikimin e buxhetit të vitit 2013, duke ulur nivelin e të ardhurave të parashikuara për t’u mbledhur deri në fund të vitit 2013. Por, gjatë tremujorit të fundit, tatimet dhe doganat rriten performancën e tyre në mbledhjen e të ardhurave, duke bërë që qeveria ta rishikonte sërish buxhetin përmes një tjetër akti normativ. Opozita gjatë debatit në Komisionin e Ekonomis[, e ka cilësuar të paligjshëm Aktin Normativ. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin