22/01/2014 19:09:22

Riemërime të lodhshme

nga Doriana Metollari

HermesNews - Ajo çfarë po ndodh në Shqipëri, dmth ajo që po ndan epokat për të cilat selia e Bashkimit Europian në Tiranë me siguri po mban shënime, janë riemërimet që po bëhen në pozicione të ndryshme. Por ndërsa BE buzëqesh kur lexon vendimet e qeverisë dhe mbyll telefonatat me Brukselin me fjalët “progres në integrim”, drejtorët e riemëruar kanë beteja të tjera për të bërë në terren. Flas për drejtorët e riemëruar në kohën e qeverisë demokrate. Ata që, pas marrjes së pushtetit mendohej automatikisht se duhej të ndryshonin, për t’ua lënë vendim “të vetëve”. Kjo nuk ka ndodhur kudo. Shumë janë riemëruar dhe në terren tonet e zërit mes tyre dhe politikës rozë janë ngritur le të themi mbi një dialog të zakonshëm, siç është në traditë me “fjalën e fundit, në fillim” plus një dozë të mirë fyerjesh dhe kërcënimesh.

Bashkimi Europian ka nënvizuar me vija të kuqe këtë pjesë të strukturës shtetërore dhe Qeveria shqiptare po mban frerët e klimës duke marrë seriozisht në konsideratë riemërimet. Automatikisht këto vende mendohej të merreshin nga socialistët e sapoardhur dhe siç dihet deputetët kanë gjithmonë një rol interesant kur bëhet fjalë për to, por nëse mbi vendimet e qeverisë nuk mund të dalë askush, betejat në terren janë tepër të lodhshme.

Asgjë nuk mbyllet lehtësisht dhe shteti shqiptar ende nuk e ka “rëndësinë” e firmës. Çfarë do të thotë, se superioriteti strukturave shtetërore duhet t’i hapë rrugë punës dhe jo tentativa për zhbërjen e vendimeve në terren.

Shqipëria do ta kishte rrugën autostradë nëse autoriteti i shtetit nuk do të vihej në dyshim. Ajo që po ndodh aktualisht dhe po i ndodh shumëkujt veri-jug në të njëjtën kohë, në forma të ndryshme, por qëllim të njëjtë, është një realitet tipik shqiptar që perëndimi po sheh me vëmendje sesi po zgjidhet.

A mund të zbresë shteti në terren ? Apo duhet të ngjiten të riemëruarit në shtet ? Nuk shoh ndonjë zgjidhje aktualisht, tek këto dy rrugë. Unë besoj tek komunikimi, dhe transparenca. Besoj tek fjala, dhe jo sepse e kam profesion, por sepse është e vetmja rrugë për të bërë një dalje të butë, nga rruga e errët e tranzicionit shqiptar. Besoj tek analizat, opinionet, denoncimet, sille nga të duash, unë e quaj prapë komunikim.

Nëse ekziston një problem, fsheja e tij vetëm e zmadhon. Shqipëria sot ka një problem. Ky problem nuk ka fajtorë as shtetin, as opozitën. Njerëzit janë atë që krijojnë komplikacione në rrugën e demokracisë, dhe me njerëzit duhet te punohet.

Disa do t’a quanin ilaç. Unë them se duhet te jetë një premtim. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin