16/01/2014 14:03:31

2.1 % rritje gjatë këtij viti

Defiçiti i llogarisë korente të vendit tonë do të ngushtohet gradualisht nga 8.2% të Prodhimit të Brendshëm Bruto, që ishte në vitin 2013, në 7.1% në këtë vit dhe në 6.3% të Prodhimit të Përgjithshëm në 2015-ën

TIRANE - Banka Botërore parashikon që ekonomia e Shqipërisë do të rritet me 2.1% në nivel vjetor gjatë 2014-ës, një përshpejtim i konsiderueshëm krahasuar me rritjen 1.3% të vlerësuar për 2013-ën. Në edicionin e Janarit, të titulluar “Perspektivat Ekonomike Globale”, Banka Botërore parashikon që prodhimi ekonomik i Shqipërisë të përshpejtohet më tej në vitin 2014 dhe 2016 deri në 3%.

Ndërsa defiçiti i llogarisë korente të vendit tonë do të ngushtohet gradualisht nga 8.2% të Prodhimit të Brendshëm Bruto, që ishte në vitin 2013, në 7.1% në këtë vit dhe në 6.3% të Prodhimit të Përgjithshëm në 2015-ën.

Në krahasimin rajonal, Shqipëria do të rritet më shpejt se Bosnjë-Herzegovina (2%) dhe Serbia (1%) por do të lihet pas nga Kosova (4%), Maqedonia (3%) dhe Mali i Zi (2.5%). Edhe qeveria shqiptare parashikon pak a shumë të njëjtën shifër të rritjes për këtë vit. I të njëjtit opinion është edhe Fondi Monetar Ndërkombëtar, sipas raportit më të fundit mbi projeksionet ekonomike. Edhe Banka Europiane për Rindërtim dhe Zhvillim, BERZH, ka përmirësuar pritshmëritë për rritjen ekonomike të Shqipërisë në 2% gjatë këtij viti, nga 1.9% që ishte vlerësimi i mëparshëm. Edhe institutet shkencore në raportet tremujore për Europën Qendrore dhe Lindore parashikojnë se ekonomia e Shqipërisë do të rritet me 2% gjatë këtij viti nga 1.7% që ishte vlerësimi për rritjen ekonomike gjatë vitit 2013. Një ditë më parë Banka Botërore publikoi raportin mbi “Perspektivat Ekonomike Globale” dhe parashikohej një përmirësim i ekonomive të pasura dhe një ngadalësim i ekonomive në zhvillim. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin