15/01/2014 17:25:04

Bashkimi Europian siguron tregjet

Marrëveshja joformale ka mundësuar daljen nga ngërçi i krijuar mbi dosjen që Komisioni Europian e kishte paraqitur rreth dy vite më përpara, në tetor të 2011

STRASBURG - Një marrëveshje parimore është arritur, dje në mbrëmje mes negociatorëve të Parlamentit dhe të Këshillit Europian, që përfaqëson shtetet e BE-së, mbi disa masa që do të shërbejnë për të kontrolluar më mirë tregjet në aspektin financiar.

Kjo marrëveshje joformale ka mundësuar daljen nga ngërçi i krijuar mbi këtë dosje, të cilën Komisioni Evropian e kishte paraqitur rreth dy vite më përpara, në tetor të 2011, propozim ky që kishte të bënte me rishikimin e direktivave evropiane mbi mekanizmat financiare të tregjeve.

Ligji i ri evropian do të mundësojë që tregjet financiare të jenë më të sigurta dhe më të efektshme, të mbrohet më mirë investitori, të ulen spekullimet mbi tregjet e lëndëve të para dhe të kontrollojë më mirë lojën në bursë, që mbështetet mbi transaksione financiare që kryhen brenda sekondit, bëhet me dije nga Parlamenti në një komunikim për shtyp të publikuar dje në mbrëmje.

Komisionieri Evropian për Shërbimet Financiare, Michel Barnier, ka përshëndetur këtë marrëveshje në një komunikim për shtyp, “këto rregulla të reja do të përmirësojnë funksionimin e tregjeve të kapitaleve në përfitim të ekonomisë reale, ato vendosin një përparim vendimtar drejt vendosjes së një sistemi financiar më të sigurt, më të hapur, më të përgjegjshëm dhe do të risjellë besimin e investitorëve pas kësaj krize financiare që po kalojmë”. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin