15/01/2014 08:33:55

Kur ylli përpihet nga një “vrimë e zezë”

Për herë të parë në historinë e astronomisë dy skuadra astronomësh kanë vëzhguar zhdukjen e një ylli për shkak të një “vrime të zezë”.

HermesNews- Për herë të parë në historinë e astronomisë dy skuadra astronomësh kanë vëzhguar zhdukjen e një ylli për shkak të një “vrime të zezë”.

Duke nisur nga viti 1999 një burim me rreze X, tejet vezullues, qe paraqitur në një ndër galaksitë e studiuara për t’u zhdukur më pas ngadalë në 2005.
Sipas hulumtuesve shkencorë, kur një yll gjendet pranë një “vrime të zezë” mjaft të madhe fillon e shkatërrohet pjesë pjesë duke prodhuar një rrezatim të fortë me rreze X për shkak të ngrohjes së tepërt termike që arrin deri në disa miliona gradë.

Ky episod, edhe pse nuk është i vetmi, është mjaft interesant për studimet shkencore pasi zhvillohet në një galaksi me përmasa të vogla. Kjo galaksi bën pjesë në një grumbull të gjerë galaksish i njohur si Abell 1795 me një distancë prej pothuajse 800 milion vite dritë nga Toka.

Ajo përmban rreth 700 milion yje, një numër i vogël në krahasim me “Udhën e qumështit”, galaksinë që përmban planetin tonë dhe rreth 200-400 miliard yje të tjera.

Vrima e zezë për të cilën bëhet fjalë paraqet përmasa mesatare, sipas llogaritjeve duhet të jetë vetëm disa qindra miliona herë më e madhe se Dielli. “Vrimat e zeza” janë tashmë një fenomen i njohur për shkencëtarët, por ato të përmasave mesatare janë gjithmonë të vështira për t’u identifikuar dhe përcaktuar.

Studimet rreth këtyre fenomeneve mund të ndihmojnë shkencën në përparimin e studimeve rreth zhvillimit dhe evolucionit që kanë pësuar galaksitë e para.

Daniela Vathi

Dërgo me email | Stampo artikullin