09/01/2014 15:46:57

Taksa për abuzuesit me karburantet

Në disa pika të shitjeve me pakicë të karburanteve, ditën e sotme, në qytetin e Korçës, një litër benzinë është shitur maksimalisht me 190 lekë, ndërsa nafta 188 lekë për litër

KORÇË - Viti i ri 2014 erdhi bashkë me rritjen e paralajmëruar të çmimit të karburanteve.

Në disa pika të shitjeve me pakicë të karburanteve, ditën e sotme, në qytetin e Korçës, një litër benzinë është shitur maksimalisht me 190 lekë, ndërsa nafta 188 lekë për litër.

Rritja e çmimit në qytetin juglindor varion nga 10 deri 15 lekë për litër. Ndërsa një pjesë e kompanive operuese kanë rritur çmimin e karburanteve, pas vendimit të qeverisë pë rritjen e taksës së qarkullimit, ka edhe nga ata që e kanë mbajtur të pandryshuar çmimin për litër të naftës dhe benzinës, ndonëse kjo duket se nuk do të zgjasë shumë.

Rritja e çmimit të karburanteve nga rritja e aksizës për këtë vit ka bërë që mjaft drejtues mjetesh të furnizohen me sasira të mëdha para pritjes së vitit të ri. Kjo është vënë re në ditët e para të 2014-ës, ku shitja në disa pika të tregtimin me pakicë të karburantit ka qënë mjaft e pakët.

Rritja e taksës së qarkullimit për karburantet me 10 lekë, e parashikuar në paketën fiskale 2014, e miratuar në fund të vitit 2013. ka lënë vend për spekulime. Arsyeja kryesore lidhet me faktin se grosistët e karburanteve operojnë me tre muaj rezerva, kështu që efekti i rritjes së taksës nuk mund të shtrihej që në ditën e parë që ligji ka hyrë në fuqi.

E gjithë kjo situatë ka dhënë efektet e para në xhepat e konsumatorëve, të cilët shprehen të indinjuar nga kjo rritje e çmimeve. Madje, disa prej tyre ngrenë shqetësimin edhe për cilësinë apo sasinë e karburantit që blejnë, pasi jo të gjitha pikat e tragtimit kanë rritur çmimet, madje në disa prej tyre ka pasur edhe ulje.

Më të shqëtësuar janë bizneset që kanë në bazë transportin e mallrave apo të produkteve të ndryshme. Por edhe qytetarët që nuk disponojnë një mjet transporti, i druhen rritjes së çmimit të biletave të transportit urban apo edhe më gjerë, e paralajmëruar nga drejtuesit e linjave të transportit.

Meqënëse çmimet variojnë nga njëra pikë e tregtimit tek tjetra, qytetarët kërkojnë që të zhvillohen kontrolle të imtësishme në këto subjekte. Përgjegjësi i sektorit të Edukimit dhe Marrëdhënieve me publikun, pranë Drejtorisë Rajonale Tatimore Korçë, Tomi Tontonozi, tha se të dhënat për paketën e re fiskale kanë mbërritur pranë kësaj drejtorie dhe pasi ato të përpunohen, do të këtë një përgjigje zyrtare lidhur me këtë çështje.

“Ditën e djeshme, kanë mbërritur të gjitha materialet për paketën fiskale 2014. Menjëherë do të bëhet përpunimi i të dhënave dhe shumë shpejt ne do të dalim në një prononcim zyrtar sesi do të vijojë puna për kontrollet që do të ushtrohen dhe masat që do të merren për subjektet”, bëri të ditur Tontonozi.

Të njëjtën gjë kanë pohuar edhe burimet pranë Prefekturës Korçë, sipas të cilave, ende nuk ka asgjë konkrete për ngritjen e një task-forcë për të ushtruar kontrolle në terren. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin