31/12/2013 09:37:13

Familjarët kërkojnë më shumë impenjim nga ana e policisë

Hetimet janë intensifikuar, por deri tani nuk ka një pistë të caktuar, apo ndonjë gjurmë të 18 vjecarit

KUKES - Ende asnjë gjurmë të 18 vjeçarit Genc Gashi nga Kukësi i zhdukur që nga e premtja e kaluar. Ngjarja e rëndë për familjen Gashi nga fshati Shtanë i komunës së Shëmrisë ka tronditur gjithë banorët e zones, ndërsa familjarët vazhdojnë kërkimet dhe bëjnë thirrje për më shumë angazhim të strukturave shtetërore për zbardhjen e së vërtetës.

E ëma e 18 vjecarit, Xhemile Gashi, thotë se, "ende nuk dimë asgjë. Kemi pyetur tërë shokët e tij, tërë fshatin e të afërmit, po na është thënë se nuk e ka parë njeri, ndërsa telefoni i tij vazhdon të jetë i mbyllur".

Ndërkohë, burime zyrtare të policisë së rrethit të Kukësit bëjnë të ditur se, "hetimet në lidhje me këtë ngjarje të rëndë janë intensifikuar, por deri tani nuk ka një pistë të caktuar, apo ndonjë gjurmë të 18 vjecarit".

Në rrethin e Kukësit ende kujtohet zhdukja misterioze e 6 vjecares Bleona Mata më 22 maj 2010. Megjithë kërkimet intensive të kryera edhe në Kosovë e Maqedoni, deri tani nuk është gjetur asnjë gjurmë e saj. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin