28/12/2013 09:56:18

Priten L18 miliardë nga doganat. Opozita, paralajmëron kolaps

Shkëlqim Cani, ''për vitin 2014 parashikohet rritje e të ardhurave, që do të gjenerohen përmes një reforme fiskale''

(18:30) - Kuvendi po vijon të shtunën diskutimin nen për nen të projektligjit për buxhetin e shtetit për vitin 2014 me shqyrtimin e amendamenteve te propozuara nga opozita.

Deputetja e PD-së, Jozefina Topalli akuzoi qeverinë për diferencime në shpërndarjen e fondeve buxhetore për pushtetin vendor. Sipas saj, disa bashki janë diskriminuar për shkaqe politike duke përfituar më pak financime për vitin e ardhshëm.

Zëvendëskryeministri, Niko Peleshi nuk i pranoi akuzat e opozitës, duke i konsideruar spekulime. Ai iu referua fondeve të akorduara bashkisë Korçë, që siç tha ai janë më të ulëta se ato për bashkinë Shkodër, që drejtohet nga të zgjedhur të Partisë Demokratike.

Zv/kryeministri pranoi nevojen për rishikimin e formules për ndarjen e fondeve per pushtetin vendor, por theksoi ai ne nuk mund të heqim fondet nga një bashki e të djathtës dhe t’ia kalojmë ato një bashkie të majtë. Duhet të marrë fund njëherë e mirë ndarja politike e fondeve.

(17:52) Deputetët miratuan nen për nen dhe në tërësi me shumicë votash paketën fiskale për vitin 2014: opozita votoi kundër. Sipas Ministrit të financave Shkëlqim Cani, buxheti i vitit 2014 është ndërtuar mbi bazën e një politike fiskale me mjaft të reja.

Në vazhdim të premtimit elektoral, është hequr dorë nga tatimi i sheshtë, është realizuar parimi se kush fiton më shumë, paguan më shumë. Paketa e re fiskale dallohet për ndërtimin e saj në funksion të stabilizimit të ekonomisë, duke synuar të gjenerojë rreth 18 miliard lekë shtesë të ardhura nga Tatimet dhe Doganat. Kjo barrë fiskale shpërndahet midis bizneseve dhe individëve.

Opozita gjatë diskutimit në parim akuzoi qeverinë se ka hartuar një program buxhetor dhe fiskal në panik që nuk orienton problematikën që ka ekonomia e vendit. Në fjalën e tij, ish ministri i Financave Bode tha se dy instrumentat e zgjedhur nga kjo qeveri, rritja e taksave dhe borxhi publik, veçse përshpejtojnë kolapsin ekonomik.

Ai tha se, lëngata e zgjatur e ekonomisë sonë përballë presioneve të krizës rajonale, ka dobësuar dinamizmin e saj të brendshëm dhe ka ezauruar kapacitetin prodhues dhe stimujt fiskal në planin makro, duke theksuar edhe problemet strukturore e të konkurueshmërisë.

Por, ministri i Financave Shkëlqim Cani, për vitin 2014 parashikohet rritje e të ardhurave, që do të gjenerohen përmes një reforme fiskale, përmes paketës së re për ndryshimin e një sërë tatimesh dhe taksash kombëtare e vendore, ku synohet balancimi i trinomit të interesave midis shtetit, biznesit dhe individit, përmes forcimit të disiplinës fiskale, konsolidimit të administratës tatimore.

(17:00) Ministri i Punëve të Jashtme, Ditmir Bushati u shpreh sot gjatë debatit në Kuvend per projekt buxhetin dhe paketen fiskale se, çështja çame është përparësi në programin e qeverisë shqiptare, për herë të parë, që nga ndryshimi i sistemit. "Përsa i përket veprës monumentale të Kllogjerit...projekti kushton 140 milionë lekë. Nga qeveria paraardhëse janë angazhuar në parim 70 milionë nga fondi i 2012-së...në 2012, vetëm 10 milionë janë akorduar nga 70 që ishin planifikuar, të cilat komuna i dogji, nuk dihet përse. Në vitin 2013 janë disbursuar 14 milionë dhe fondi i kësaj mazhorance, për 2014-tën, vetëm për zhvillimin rajonal në fushën e kulturës, është 90 milionë dhe këto janë për 4 projekte, 2 prej të cilave kanë të bëjnë me varrezat e Kllogjerit dhe me Pallatin e kulturës atje", tha Bushati

(15:52) Ish -ministri i Financave në qeverisjen demokratike, Ridvan Bode, deputet i Partisë Demokratike, i kërkoi përmes një amendamenti, Parlamentit të mos votojë taksën e tatim-fitimit mbi korporatat 15 % që është propozuar në paketën e re fiskale, që do të nis zbatimin nga 1 janari i viti 2014. Por Kuvendi e hodhi poshtë amendamentin e tij me 74 vota kundër. Bode argumentoi se vendosja e kësaj takse do të fuste në kaos dhe kolaps biznesin, si dhe do të dëmtonte punësimin në vend.

Propozimi i tij bazohet në bindjen se taksat më të ulëta janë instrumenti më i mirë i zhvillimit dhe i nxitjes së ekonomisë shqiptare. Bode tha se ky propozim vjen edhe në përputhje me programin elektoral të maxhorancës së sotme, e cila ka deklaruar publikisht se në vitin e parë të qeverisjes nuk do të ketë rritje të taksave mbi biznesin dhe se vetëm pasi të shmangej ‘taksa mbi korrupsionin’ dhe pas një konsultimi të gjerë me biznesin, qeveria mund të propozojë, duke rënë dakord me biznesin një taksë më të rritur mbi kompanitë.

TIRANË - Kuvendi i Shqipërisë mblidhet sot në seancë plenare për të miratuar nen për nen dhe në tërësi projekbuxhetin për vitin 2014. Pas miratimit në komisionet e përhershme, parlamenti voton sot ligjin më të rëndësishëm financiar të vendit, i cili, sipas maxhorancës, shënon një kthesë në situatën ekonomike të vendit. Miratimi në parim i p/buxhetit të ri në seancën e 24 dhjetorit, erdhi pas një debati maratonë prej rreth 25 orësh, ku deputetët e të dy palëve mbajtën qëndrime të kundërta për fondet buxhetore të parashikuara për vitin në vazhdim. Rendi i ditës i seancës së sotme parashikon dhe betimin e katër deputetëve të rinj, të mandatuar dy ditë më parë nga KQZ. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin