24/12/2013 12:30:23

Buxheti sot ne Parlament

Ahmetaj, ''ky buxhet do mbahet mënd si buxheti i uljes së taksave''

TIRANE - Ministri i Zhvillimit Ekonomik, Tregtisë dhe Sipërmarrjes, Arben Ahmetaj u shpreh sot në Kuvend ku po diskutohet p/buxheti 2014 dhe paketa e re fiskale, se "ky buxhet do mbahet mënd si buxheti i uljes së taksave, që injekton në ekonomi 1,1 miliardë usd, shuma më e madhe për vendin".

Duke shprehur bindjen se qytetarët dhe sipërmarrja nuk do zhgënjehen, Ahmetaj shtoi se buxheti 2014 është më i madhi nga përgjegjësia mes domosdoshmërisë dhe nevojave për zhvillim ekonomik në favor të qytetarit.

Duke ju drejtuar opozitës, ministri tha se "buxheti i ri garanton që me 4% të PBB, ose 350 milionë usd të paguaje borxhet që i latë të papaguara kompanive ". Bizneset kanë paguar 25% taksë për shkak të borxheve, ndërsa ne e ulëm tatim fitimin në 15%, tha ai.

Ahmetaj përmendi drejtimet kryesore të paketës së re fiskale, duke e quajtur "paketë e taksave të ulta". Sipas tij, kjo paketë heq taksën e sheshtë dhe prezanton taksën progesive, prej nga do përfitojnë 97% e shqiptarëve, që do fitojnë një pagë shtesë, pasi u rritet paga reale mbi 10% nga ky proces.
"Ne heqim taksën e sëmundjes duke ulur me 10% cmimet e ilaceve dhe fusim taksën e shëndetit, që është në favor të shqiptarit, pasi ul trafikun dhe përmirëson shërbimet publike. Qytetarët mbi 40 vjec do kenë vizita shëndetësore falas, 30 mijë gra do fitojnë vizita falas kundër kancerit të gjirit", tha ai.

Sipas ministrit, ky buxhet do mbahet mënd si buxheti i uljes së taksave dhe sipërmarrja nuk do zhgënjehet, pasi do të injektohen në ekonomi 1,1 miliardë usd, ku 650 milionë usd do të jenë investime. Vetëm në infrastrukturë do të zhvillohen 89 projekte të reja, tha Ahmetaj.

Ministri i Zhvillimit Ekonomik, Tregtisë dhe Sipërmarrjes, Arben Ahmetaj përmendi situatën që gjeti qeveria Rama me arkën e shtetit. "Kanë qënë tre muaj të vështirë ku u përballëm me një Shqipëri me borxhe. Janë 720 milionë usd borxhe, që opozita e sotme u ka lënë në kurriz shqiptarëve, të akumuluara deri në nëntor 2013", tha ai.

Sipas Ahmetaj, vetëm në 5 muaj të qeverisjes së djathtë në ikje, keqmenaxhimi shkaktoi 110 milionë euro dëm. Ahmetaj akuzoi edhe për mospagesat ndaj shtresës së invalidëve, duke thënë se "edhe invalidët i patë si amiq dhe 42 milionë usd të tyre i bëtë rrush e kumbulla për vete".

"Jeni unik dhe të papërsëritshëm për t'a lënë vendin si mos më keq, këtë herë e latë akoma dhe më keq se në 97-tën. Ju e morrët me 6% rritjen ekonomike në 2005 dhe e latë me 1%. E latë energjetikën me 1,2 miliardë usd borxhe, latë një privatizim të dështuar në "Albeptrol", ndërsa nga kontrollet po dalin miliona usd devijime. Ju u tallët me taksën e sheshtë, se shqiptari paguante më shumë. Sot vetëm 4% e shqiptarëve kanë mëse 50% të depozitave, fuqia blerëse ka rënë 40%, ndërsa rënia e kursimeve të shqiptarëve është drastike", tha Ahmetaj.

Ministri i Zhvillimit Ekonomik, Tregtisë dhe Sipërmarrjes, Arben Ahmetaj premtoi se "në 4 vjet, do ta rrisim me 6% dhe më tej më 7% rritjen ekonomike të vendit". Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin