21/12/2013 17:52:10

Data që zgjat ditët në vijim

Sipas parashikimeve meteorologjike, edhe gjatë javës së ardhshme do të mbizotërojë moti i kthjellët

DURRES - Rrugët e Durrësit janë plot me njerëz, falë motit të mirë. Megjithëse sot ka nisur zyrtarisht stina e dimrit, dielli që shkëlqen dhe temperaturat e favorshme duket se gjatë fundjavës do ti mbajnë qytetarët jashtë shtëpive. Koha e mirë ka favorizuar edhe njësitë tona tregtare, tha Edmond Shuke, që drejton një bizneset e vegjël në bulevardin "Epidamnus".

Që prej një jave në qytetin bregdetar mbizotëron moti i kthjellët dhe kjo duket se do t'i vijë në ndihmë edhe bareve dhe restoranteve buzë detit. Dita e solsticit dimëror ka shënuar thjesht fundin e vjeshtës dhe fillimin zyrtar të stinës së dimrit, por kjo nuk ka ndikuar në zgjedhjet e qytetarëve durrsakë.

Ne jemi prenotuar nga dy festa shkollarësh njëra pas tjetrës, tregon Martini, që punon në një nga lokalet e shëtitores "Taulantia", sheshet e së cilës edhe sot kanë qenë të mbushura me familjarë, të rinj dhe të reja. Këtu nuk ka automjete dhe jemi të qetë për fëmijët e vegjël, të cilët edhe mund të dëfrehen në lodrat me pagesë, thotë një nga nënat e reja, të cilat kanë preferuar të qëndrojnë në lulishtet jashtë lokaleve. Sipas parashikimeve meteorologjike, edhe gjatë javës së ardhshme do të mbizotërojë moti i kthjellët. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin