21/12/2013 17:50:38

Barak Obama fillon pushimet

Familja Obama u prit në Honolulu nga admirali Samuel Locklear, i cili drejton komandën e ushtrisë amerikane në Paqësor,

HONOLULU - Presidenti amerikan Barak Obama mbërriti dje në mbrëmje vonë në Havai, vendlindja e tij, ku ai do të kalojë bashkë me familjen rreth pesëmbëdhjetë ditë pushime pas një viti veçanërisht të vështirë në Shtëpinë e Bardhë. Familja Obama u prit në Honolulu nga admirali Samuel Locklear, i cili drejton komandën e ushtrisë amerikane në Paqësor, guvernatori i shtetit Neil Abercrombie dhe nga kryetari i bashkisë së Honolulusë Kirk Caldwell.

Më tej, familja presidencile, Barak, bashkëshortja Michelle dhe vajzat Malia dhe Sasha mbërritën në shtëpinë e marrë me qera për këtë rast. Presidenti amerikan e mbylli vitin politik me një konferencë shtypi në Shtëpinë e Bardhë, disa orë përpara nisjes për pushime.

Disfata në politikën e jashtme, rezultate parlamentare të dobëta dhe dështim lidhur me reformën në shëndetësi: Barack Obama ka preferuar ta shmangë bilancin e vitit të vështirë 2013 dhe shpreson për "arritje për Shtetet e Bashkuara gjatë vitit 2014".

"Fundi i vitit është gjithmonë një çast i mirë për reflektim për atë që mund të bëjmë më mirë vitin e ardhshëm", ka shtuar ai: "Jam i sigurt se do të kem ide më të mira pas disa ditësh shplodhjeje me gjumë dhe diell". Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin