21/12/2013 12:04:28

Skandali i korrupsionit në Turqi: arrestohen djemtë e ministrave

Skandali prek rrethin e ngushtë të Erdogan

STAMBOLL - Djemtë e dy ministrave turq, atij të Punëve të Brendshme dhe të Ekonomisë u arrestuan sot pasi akuzohen nga Gjykata e Stambollit se jenë pjesë e një skandali korrupsioni që prek edhe kryeministrin, Rexhep Taip Erdogan, skandal ky që ka tronditur gjithë Turqinë, raportohet në median vendase.

''Madje edhe drejtori i përgjithshëm i një banke të madhe publike, 'Halkbank', figuron ndër personalitetet e akuzuara për korrupsion aktiv, vjedhje, trafikim të floririt dhe shpërdorim të detyrës'', thanë stacionet televizive NTV dhe në CNN Turk.

Është hera e parë që një skandal i këtyre përmasave prek rrethin e ngushtë të Erdoganit, i cili drejton Turqinë që nga viti 2002 në krye të një qeverie islamiko-konservatore.

Gjykata ka akuzuar gjithashtu edhe një biznesmen irano-azer, Reza Zerrab, i dyshuar se është në qendër të një trafiku të gjerë ilegal të floririt drejt Iranit, ndërkohë që ky i fundit ndodhet nën embargo ndërkombëtare.

Ndërsa djali i ministrit të Mjedisit u arrestua, pas një hetimi të gjerë që kreu policia duke prekur rreth 80 individë, por u lirua në mbrëmjen e djeshme pasi ishte marrë në pyetje për disa orë nga prokurorët dhe gjyqtarët.

E goditur rrëndë nga kjo çështje që po ndodh vetëm katër muaj përpara zgjedhjeve lokale, qeveria vazhdoi dje valën e arrestimeve në polici që preku rreth 17 funksionarë të lartë të këtij institucioni.

Erdogan largoi nga puna rreth 50 oficerë policie pasi kanë abuzuar me postin duke mos njoftuar autoritetet politike për hetimin në fjalë.

Sikurse kishte vepruar kundër një sulmi ndaj qeverisë që kishte tronditur vendin në qershor, kryeministri u rikthye sërisht tek teoria e komplotit dhe akuzoi se ''po krijohet një shtet brenda shtetit, i cili është në origjinën e këtij operacioni të ndyrë që synon të më prishë reputacionin''. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin