19/12/2013 16:58:34

Një biznes me 1 milion e 458 mijë xhiro vjetore kursen 350 mijë Lekë

Takim me biznesin e vogël: Rama i shpjegon paketën e re fiskale të qeverisë

TIRANË - Kryeministri Edi Rama vizitoi sot disa biznese të vogla në zonën e Don Boskos në Tiranë, për t’i njohur dhe shpjeguar efektet e ndryshimeve të reja fiskale për këtë biznes, në buxhetin e tyre personal.

Kryeministri sqaroi në shifra konkrete përfitimet nga heqja e taksës dhe ulja e tatim fitimit për biznesin e vogël, çka do t’i lehtësonte njëherësh edhe nga barra burokratike.

"I gjithë sistemi do ndryshojë. Kështu që, ju nuk do të keni dy palë tatime, dy palë grupe, dy palë letra, dy palë halle. Ju keni vetëm një tatim fitimi që nga 10% bëhet 7.5%", u shpreh shefi i qeverisë.

Ndërsa në një tjetër biznes, me një xhiro vjetore prej 1 milion e 458 mijë lekësh, Kryeministri u ndal përsëri për një përllogaritje të lehtësimit të barrës me paketën fiskale 2014. Pas një përllogaritjeje të atypëratyshme me drejtuesen, e vetëpunësuar në këtë aktivitet, rezultoi se në fund të vitit, ajo do të kursente rreth 350 mijë lekë.

Rama garantoi se përfitimi nga ulja e barrës fiskale do të jetë e ndjeshëm për të gjithë biznesin e vogël në mbarë vendin. "Taksën e biznesit të vogël ju e paguanit 595 mijë lekë. E gjitha aforfe të pushteti vendor. Përveç pushtetit vendor që ua merrte aforfe, arbitrare komplet ju paguanit edhe tatim fitimin 10%. Tani, taksa e biznesit të vogël nga 595 mijë lekë bëhet zero. Ju do paguani vetëm një herë dhe do paguani tatim fitimin jo 10%, sa ç’ishte, por 7.5%. Dhe praktikisht, në fund fare ju kurseni 345 mijë lekë," theksoi Rama.

Teksa u ndal në një tjetër biznes, Kryeministri bëri një vlerësim të efektit të përgjithshëm që këto masa të reja fiskale do të kenë mbi buxhetin e tij.
"Xhiron e deklaruar ju e keni 1 milion e 320 mijë. Taksa e biznesit të vogël që ju e paguanit aforfe, nga 450 mijë lekë bëhet zero. Nuk keni më taksë të biznesit të vogël. Nuk ka më aforfera në kurrizin tuaj.

Tatim fitimi që ju rezultonte në fund, nga gjithë kjo llogari, në 275 mijë lekë bëhet 250 mijë dhe në finale, që nga viti i ardhshëm nuk do paguani gjithë këto, por do të paguani vetëm 250 mijë lekë. E, në fund, vetëm nga ulja e përgjithshme, ju do fitoni 200 mijë lekë", sqaroi Kreu i Ekzekutivit.

Madje kryeministri duke theksuar se kështu vihet në vend një padrejtësi, duke përsëritur parimin se kush fiton më shumë do paguajë më shumë dhe kush fiton më pak do të paguajë më pak, iu la në duar biznesmenëve të vegjël edhe përllogaritjet e taksimit.

"Mbajeni këtu me shkrimin tim dhe nesër, në qoftë se nuk ndodh kështu, thoni që nuk na ndodhi kështu. Ja ku e keni me shkrimin tim", garantoi Kryeministri. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin