15/12/2013 11:57:10

Mbrojtja e Mjedisit në Rajonin e Dibrës

Konferencë ka për rritjen e vëmendjes së aktorëve të interesit në nivel lokal, kombëtar dhe rajonal

TIRANE - Në kuadër të projektit ndërkufitar “Mbrojtja e Mjedisit në Rajonin e Dibrës”, i cili financohet nga Bashkimi Evropian dhe zbatohet nga Qendra “Integrim e Zhvillim Demokratik” me qendër në Kukës dhe nga “Qendra për Zhvillim të Qendrueshëm të Komunitetit” në Dibër (Maqedoni), organizohet në datën 17 Dhjetor 2013, në Peshkopi, Konferenca Ndërkufitare “Nxitja e Mbrojtjes së Mjedisit përmes Bashkëpunimit Ndërkufitar”.

Kjo konferencë ka për qëllim rritjen e vëmendjes së aktorëve të interesit në nivel lokal, kombëtar dhe rajonal për intensifikimin e bashkëpunimit ndërkufitar dhe ndërsektorial në funksion të mbrojtjes së mjedisit dhe menaxhimit të aseteve mjedisore në mënyrë sa më të qendrueshme jo vetëm në të dyja anët e kufirit të Rajonit të Dibrës, ku përqendrohet aktiviteti i projektit, por edhe në nivel kombëtar në dy shtetet përkatëse. Është e qartë që mbrojtja e aseteve mjedisore nuk mund të menaxhohet pa patur bashkëpunim ndër-kufitar pasi lumenjtë, pyjet, kullotat, flora dhe fauna nuk njohin konvencione të tilla si kufijtë administrativë apo politik. Është e nevojshme që autoritetet dhe aktorët e interesit të rrisin vetëdijen e komuniteteve se p.sh.: ndotja e lumit Drin në Strugë dëmton automatikisht dhe njëlloj qytetarët e Shkodrës ku kalon lumi Drin apo qytetarët e Ulqinit i cili laget nga Deti Adriatik ku dhe derdhet Lumi Drin.

Në këtë konferencë do të flasin përfaqësues të qeverive vendore dhe kombëtare, specialistë të mjedisit, ekspertë të zhvillimit të qendrueshëm, përfaqësues të klubeve mjedisore – të cilat janë krijuar në kuadër të projektit duke vënë në jetë një praktikë të mirë në gjithpërfshirjen e qytetarëve në mbrojtjen e mjedisit, si dhe sipërmarrës të suksesshëm nga komuniteti. Përfaqësimi në nivele të larta nga të tre sektorët (sektori pubik, privat dhe shoqëria civile) bëhet me qëllim që mesazhi që i dërgohet komuniteteve dhe aktorëve të interesit të ketë një impakt sa më të fortë.

Gjithashtu, kjo konferencë synon që të dalë me disa ide konkrete mbi aksionet që mund të ndërmerren në të ardhmen në kuadër të adoptimit të praktikave më të mira në mbrojtjen e mjedisit dhe menaxhimin e aseteve mjedisore në mënyrë sa më të qendrueshme për komunitetet në territor. Në këtë kuadër përfaqësues nga qarqet e tjera të vendit, nga institucionet kombëtare dhe ndërkombëtare janë ftuar që të kontribuojnë me propozime konkrete. Na ndiqni dhe në Facebook dhe Twitter

Deklaratë për shtyp

Dërgo me email | Stampo artikullin