13/12/2013 11:32:44

Eksploziv në makinën e Prefektit të Vlorës

Rrethohet Kryeministria: 200 gram eksploziv C4 në makinën e Besnik Dervishit

(11:42) Ministria e Punëve të Brendshme sapo doli me një komunikatë zyrtare për mediat lidhur me ngjarjen në mjediset e jashtme të selisë së Kryeministrisë.

Sipas komunikatës zyrtare, sot, rreth orës 09:30 automjeti tip “Peugeot” me targa “TR 5066 N”, në pronësi të shtetasit Besnik Dervishi, me detyrë prefekt i Vlorës, është drejtuar për të hyrë në mjediset e selisë së Kryeministrisë. Nga kontrolli i specializuar i ushtruar nga efektivat e Gardës në hyrje të zonës së brendshme të Kryeministrisë, është konstatuar se në pjesën e poshtme të automjetit ishte vendosur një objekt i dyshuar si sasi eksplozivi.

Oficerët e Gardës së Republikës i kërkuan drejtuesit dhe pasagjerit të automjetit, të largoheshin nga mjeti si dhe bënë bllokimin e lëvizjes së mjeteve në hyrje të Kryeministrisë.

Menjëherë janë njoftuar shërbimet e specializuara të Policisë së Shtetit dhe Njësia Antieksploziv e repartit RENEA si dhe Prokuroria për Krimet e rënda.

Policia ka urdhëruar dhe ka marrë masa të menjëhershme për evakuimin e të gjithë personave rreth vendit të ngjarjes duke siguruar edhe perimetrin e nevojshëm për kryerjen e veprimeve nga ana e ekspertëve antieksploziv.

Nga veprimet e kryera nga njësia antieksploziv dhe nga kqyrja e detajuar e automjetit është vërtetuar se në mjet ishte vendosur një sasi prej më shumë se 200 gram eksploziv C4, me të cilën ishin lidhur dy kapsolla detonatore dhe një celular. Njësia antieksploziv në Policinë e Shtetit ka bërë neutralizimin e sasisë së eksplozivit. //komunikata//

TIRANË - Institucioni i Kryeministrisë është vënë në alarm paraditen e sotme, pas një telefonate në orën 09:20 pranë sallës operative, sipas të cilës në ambientet e Kryeministrisë është vendosur lëndë eksplozive. Policia dhe ekspertët rrethuan zonën. Personeli është zhvendosur te Ministria e Financave. Kontrollet u përqëndruan më pas tek një automjet i parkuar gabim pranë kryeministrisë. Policia bllokoi qarkullimin në bulevardin "Dëshmorët e Kombit" si dhe kontrolloi të gjitha automjetet e parkuara anës rrugës. Kjo eshtë hera e parë qe vihen në qendër të vëmendjes për lëndë eksplozive Kryeministria. Kryeministri i vendit, Edi Rama, ndodhet aktualisht në një vizitë zyrtare pune në Itali. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin