12/12/2013 12:54:03

Politika e gjigantëve të internetit ndaj Kosovës

Google dhe Facebook njohën Kosovën shtet. Amazon, eBay, Google, Skype dhe Yahoo, ende nuk e kanë njohur Kosovën si të pavarur

TIRANË - “Si i bindi ushtria e vogël e njerëzve, Facebook dhe Google si dhe gjigantët e tjerë të internetit, të njohin një prej shteteve më të reja të botës”, është kjo pyetja që ka ngritur në një lajm-analizë, Daniel Mihailescu i AFP-së, referuar “Foreignpolicy.com”.

"Si e vendosni një shtet në hartën e botës?", duke vijuar se “për shekuj, kjo gjë” sipas Foreign Policy, “shtetësia është marrë duke derdhur gjak në fushën e betejës, apo marrë vendime nga dhomat e diplomatëve të mbushura plot tym”.

Por shtetet e reja sipas foreignpolicy.com “kanë gjetur rrugë të mesme të këtij rrugëtimi: Të njihesh në mbarë botën nuk është e thënë të marrësh votën nga Kombet e Bashkuara, por që ta fitosh “këtë luftë me gjigantët e internetit”, citohet më tej në artikull, duke bërë me dije se rrjeti social Facebook si dhe motori i kërkimit Google, e njohën Kosovën si shtet të pavarur.

Diplomacia dixhitale sipas këtij artikulli, duke iu referuar të shkruarës, “tashmë diplomatët angazhohen me qytetarët, aleatët, madje edhe me rivalët e tyre në internet për të debatuar a sugjeruar zhvillimin e politikave të reja, duke iu përgjigjur ngjarjeve të sotme. Ky është një koncept tejet i ri, si një përmbysje e asaj “tradicionales”.

Artikulli më tej i referohet një historiku të Kosovës deri në marrjen e Pavarësisë më 17 shkurt 2008, ku citohet se “pesë vite pas një deklarimi të pavarësisë së njëanshme nga Serbia dhe e njohur nga 106 shtete anëtare të Kombeve të Bashkuara, Kosova është ende duke luftuar për pranimin nga Rusia, Kina, India si dhe shumë vende të tjera me ndikim, disa prej të cilave janë në kundërshtim për shkak të rajoneve separatiste të tyre”.

Diplomacia Dixhitale mund të ndihmojë në kauzën e Kosovës duke i lidhur zyrtarët dhe qytetarët e saj me diplomatët vendorë për të marrë sugjerime, por edhe qytetarët e shteteve të tjera si formë presioni nga ata kundrejt qeverive të tyre, për të njohur shtetin më të ri ballkanik.

Sipas foreignpolicy.com “Kosova ka ende për të bërë: Shteti është injoruar nga disa faqe si Amazon, eBay, Google, Skype dhe Yahoo, të cilat ende nuk e kanë njohur Kosovën si një shtet të pavarur. Mijëra të tjera, më pak të njohura, të cilat janë faqe ndërkombëtare, portale informative apo platforma të medias sociale të cilat nuk e përfshijnë Kosovën si një shtet të pavarur”.

Më tej kjo faqe përshkruan se “kjo mungesë e njohjes digjitale ndikon drejtpërdrejt edhe mbi kosovarët”, pasi sipas tyre “në se duan të blejnë një libër apo produkt në Amazon, si do ta sjellin në adresën e shtëpisë së tyre në Prishtinë? Për shkak se kjo faqe nuk e njeh Kosovën si shtet të pavarur, kosovarët detyrohen ta vendosin Shqipërinë si vendbanimin e tyre, ndërsa në nënkategorinë e kutizës shtesë shkruhet "Kosovo Kosovo Kosovo", si për të thënë që nuk jetojnë apo kanë rezidencën në Shqipëri. Por kjo nxjerr probleme. Pasi shumë pako të nisura drejt kësaj nënkategorie, thjesht zhduken rrugës...nga pengesat burokratike. E njëjta gjë dhe dhimbje koke e ngjashme ndodh edhe me kompani të tjera digjitale”.

Sipërmarrësi Kushtrim Xhakli sipas foreignpolicy.com kërkon ta ndryshojë këtë gjë. “Duke u bazuar në përpjekjet për njohjen e Kosovës si shtet të pavarur është “në radhë të parë dinjitet dhe të pasurit të drejtë për të dhënë dhe marrë nga njerëzit në mbarë botën”, thotë ai.

“Si ish-këshilltar i Ministrisë së Arsimit në Republikën e Kosovës, Xhakli është iniciatori i një fushate për njohjen digjitale të këtij shteti më të ri në Evropë”.
Sipas komentit të faqes online në artikullin e Daniel Mihailescu-t, “Mbi 70 për qind e popullatës prej dy milionësh të vendit është nën moshën 30 vjeç, ndërsa 80 për qind është përqindja e penetrimit në faqet online apo internet, çka është e ngjashme me vendet e Evropës Perëndimore.

Duke pasur parasysh të drejtën e informimit digjital, thotë Xhakli, individët e rinj në moshë të hi tech-ut mund të ndihmojë diplomatët konvencionalë me kostume në lidhjet e tyre me botën për të fituar njohjen e Kosovës, duke e bërë kështu më të lehtë edhe jetën e kosovarëve”.

Sipas faqes foreignpolicy.com, një përkrahje të veçantë ka dhënë edhe platforma e re Digital Kosovo, të cilën Xhakli e ka konceptuar, dizajnuar dhe mirëmbajtur vetë.

“Është realizuar dhe drejtuar në kuadër të Fondacionit me qendër në Prishtinë “IPKO”, një OJQ e pavarur ku Xhakli është anëtar i bordit. Iniciativa e Digital Kosovo (digitalkosovo.org) ka për qëllim ti mundësojë kosovarëve që të shfrytëzojnë shërbimet online, ashtu si edhe përdoruesit e tjerë të internetit në të gjithë botën. Faqja e internetit funksionon që nga shtatori dhe përmban raportime, përfshirje dhe informacione mbi lobingun digjital apo sukseset e fundit të njohjes së këtij shteti nga faqet online, pa qenë pjesë e Serbisë apo Shqipërisë.

Ky “Template” (faqe shabllon) është menduar, sipas foreignpolicy.com, “si një presion ndaj kompanive të mëdha virtuale që operojnë me shërbime në internet, aeroporte, gazeta, universitete, etj, të cilat nuk e njohin Kosovën si të pavarur. Qëllimi përfundimtar është që të bëjë të mundur për kosovarët përdorimin e internetit për biznesmenët, rezervimet e udhëtimeve të tyre, blerjet online e më shumë...”.

Xhakli dhe ushtria e tij digjitale të vullnetarëve që në hapat e parë, sipas foreignpolicy.com “bombardoi Google Maps me mesazhe duke kërkuar nga këta të fundit njohjen në sistemin kompjuterik të serverëve të tyre, Kosovën si shtet të pavarur. Mesazhet u nisën edhe drejt aeroportit të Londrës dhe Sidneit, duke bërë të mundur përfshirjen e Kosovës si shtet të pavarur nga këta të fundit, e po ashtu drejt Brukselit, por ende nuk kanë bërë të mundur që Kosova në tabelat digjitale të avionëve që nisen nga Prishtina drejt Brukselit, të figurojnë “Prishtina, Kosovo”, por “Prishtina, Sebia”.

"Njohja virtuale e Kosovës është me rëndësi të madhe praktike, e njëherazi një simbol i rëndësishëm, por i papranueshëm që Kosova ende nuk figuron në shumë faqe online", thotë Myrna Macgregor, Sekretarja e Parë e Ambasadës së Britanisë së Madhe në Prishtinë, referuar forgeinpolicy.com.

Artikulli i zgjeruar përmbyllet duke cituar se “Suksesi i Kosovës në sferën digjitale mund të jetë një model i dobishëm edhe për vendet e tjera që kërkojnë njohje ndërkombëtare, qoftë Sudan i Jugut apo Palestina - të cilat, ndryshe nga Kosova, tashmë kanë një domain të nivelit të lartë”, vijojnë ata më tej.

“Por ka kufizime...Ato nuk mund të zgjidhin për shembull, problemin e korrupsionit të përhapur në Kosovës, ku vendi renditet i 111-ti nga 177 shtetet e Indeksit të Perceptimit të Korrupsionit nga “Transparency International” dhe as zhbllokimin e ndarjes së thellë të rrënjosur mes komunitetit etnik shqiptar dhe atij serb.

Disa vëzhgues madje këto i konsiderojnë si dy çështjet të cilat janë pengesa kryesore e Kosovës për ta vendosur atë përkrah familjes së shteteve të tjera evropiane”.

Kthim në kohë/ Sipas gazetës kosovare “Zëri”, ka qenë kryeministri Thaçi dhe zëvendësministri i Jashtëm Petrit Selimi që janë takuar më herët me disa drejtorë marketingu të kompanisë Facebook, ndërsa një ndihmesë të madhe është dhënë edhe nga dërgimi i letrave nga anëtari i Komitetit për Politikën e Jashtme në Kongresin Amerikan, Eliot Engel.

Por përpos kësaj, sipas kolegëve kosovarë “shumë njerëz individualisht kanë punuar për ta arritur këtë njohje nga rrjeti social në të cilin janë hapur më shumë se 1.5 miliardë profile”. “Ditë më parë vetë Kryeministri Thaçi është njoftuar zyrtarisht nga drejtuesit e lartë të Facebook me seli në Dublin të Irlandës, për përfshirjen e Kosovës në këtë rrjet global social”.

Digital Kosovo/ Sipas faqes online digitalkosovo.org, “Pavarësisht faktit që Kosova tashmë ka shpallur pavarësinë, është njohur nga më shumë se 100 shtete dhe është anëtare e institucioneve të tilla si Fondi Monetar Ndërkombëtar dhe Banka Botërore, qytetarët e Kosovës vazhdojnë të mos e kenë mundësinë e përdorimit të internetit me potencial të plotë”.

“Digital Kosovo është një mundësi për ta ndihmuar Kosovën që të integrohet plotësisht në tablonë digjitale. Kjo iniciativë ndihmon në tejkalimin e barrierave virtuale duke i shtyrë një varg të gjatë të faqeve në internet që ta përfshijnë Kosovën në platformat e tyre”.

Digital Kosovo është një iniciativë e re e cila realizohet nga Fondacioni IPKO, me mbështetjen e Ministrisë së Punëve të Jashtme të Republikës së Kosovës, Këshillit Britanik dhe Ambasadës Norvegjeze në Prishtinë. Na
ndiqni dhe në Facebook dhe Twitter

HermesNews - © 2013

Dërgo me email | Stampo artikullin