11/12/2013 19:08:52

Premtimi i guximshëm i Letta-s

nga Ljubomir Milasim dhe Michele Leridon

ROMË - Kryeministri italian, Enrico Letta premtoi se do ta shpëtonte Italinë dhe se nuk do të lejonte të binte sërisht pre e krizës dhe e nxitjeve të populizmave antievropiane, me rastin e votëbesimit pas kalimit në opozitë të Silvio Berlusconit. Qeveria e kryeministrit Letta mori votëbesimin në parlament me 379 vota pro kundrejt 212, gjë që pritej të ndodhte. Të gjitha rrugët që të çonin në Parlament ishin bllokuar nga forcat e policisë nga frika e manifestimeve të reja të lëvizjes "forconi" (sfurqet - shën. përkth.), lëvizje heterogjene që mbledh fermerë të zemëruar nga fiskaliteti, tregtarë dhe shoferë, të cilët kërkojnë largimin e qeverisë.

Veprimet e kësaj lëvizjeje, që ka nisur në fillim të javës, janë shoqëruar me përplasje me forcat e rendit në veçanti në qytetin e Torinos dhe kanë marrë mbështetjen e ish-humoristit Beppe Grillo. "Një mbështeje që i është dhënë atyre që duan të shkatërrojnë demokracinë me përfaqësim", i cilësoi Enrico Letta.

"Sot do të vendosim një ndarje të thellë mes atyre që duan Evropën, që pranojnë kontradiktat dhe që duan ta reformojnë duke e ditur që pa Bashkimin Evropian do të ktheheshim në mesjetë", deklaroi ai.

"Ndërsa në krahun tjetër qëndrojnë ata që duan të bllokojnë rrugën e BE-së, ata që duan të izolojnë Italinë, që kërkojnë konsensusin nëpërmjet populizmave", shtoi Letta.

Me këto fjalë Letta iu drejtua dy partive kryesore të opozitës, Lëvizja Pesë Yjet (M5S) e Beppe Grillos dhe ''Forza Italia'' e Silvio Berlusconit, të cilët sulmojnë rregullisht Bashkimin Evropian dhe euron.

Letta kërkoi votëbesimin për të forcuar aleancën qeverisëse dhe për të mënjanuar një mosfunksionim për arsye të largimit të Berlusconit. Sipas Lettës, ky ishte një largim që e bën mazhorancën, që udhëhiqet prej tij, më të fuqishme, pas muajsh të tërë bisedimesh të gjata ku ka pasur shumë presione dhe kërcënime që nuk pushonin nga manjati i medias.

Ideja është që të arrihet një pakt ala gjerman, që u nënshkrua nga të gjitha forcat politike proqeveritare dhe të bazuar mbi masa konkrete që duhen adaptuar përgjatë gjithë vitit të ardhshëm.

Kryeministri përmendi këtë pakt dhe numëroi prioritetet për vitin 2014 ku veçoi adaptimin e një ligji të ri elektoral, aktualisht e lënë përgjysmë nga Gjykata Kushtetuese, gjithashtu premtoi se do të ulë shpenzimet në sferën e politikës, me një ulje drakoniane të numrit të parlamentarëve, gjë që është kërkuar fuqishëm nga kryetari i ri i Partisë Demokrate, kryetari i bashkisë së Firences, Matteo Renzi.

Letta ritheksoi qëllimet e tij për të luftuar papunësinë (më shumë se 12 për qind e popullsisë aktive) duke reformuar gjithashtu edhe sistemin e ndihmës sociale. Pas votëbesimit të deputetëve, fjalën e fundit do ta ketë Senati. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin