11/12/2013 15:09:01

Reformat e kërkuara nga biznesi

Një ditë pas mbledhjes së djeshme të Këshillit Ekonomik Kombëtar, Jaka tha se Dhoma e Tregtisë dhe Industrisë Tiranë vlerëson maksimalisht angazhimin dhe përgjegjshmërinë e qeverisë shqiptare për shlyerjen e detyrimeve ndaj biznesit shqiptar

TIRANE - Kryetari i Dhomës së Tregtisë dhe Industrisë së Tiranës Nikolin Jaka tha qeveria duhet t’ju ktheje besimin dhe optimizmin qytetarëve dhe sipërmarrjes, për të investuar në ekonominë e vendit tonë.

Një ditë pas mbledhjes së djeshme të Këshillit Ekonomik Kombëtar, Jaka tha se Dhoma e Tregtisë dhe Industrisë Tiranë vlerëson maksimalisht angazhimin dhe përgjegjshmërinë e qeverisë shqiptare për shlyerjen e detyrimeve ndaj biznesit shqiptar.

Mbledhja e dytë e KEK, sipas Jakës, u shoqërua me debate dhe analiza argumentash të fortë ndërmjet përfaqësuesve të sipërmarrjes shqiptare, Fondit Monetar Ndërkombëtar, Bankës Botërore dhe Qeverisë shqiptare.

"Gjatë diskutimeve të mbrëmshme u kristalizuan dy fenomene: e para ka të bëjë me seriozitetin e qeverisë për të nxjerrë vendin nga kriza dhe e bindur për të bërë reformën strukturore dhe rregullatore për të garantuar rritjen e zhvillimit ekonomik: së dyti përulje më shumë se sa duhet ndaj "bosit" të tyre që në këtë rast është Fondi Monetar Ndërkombëtar dhe Banka Botërore", deklaroi Jaka.

Sipas Jakës, qeveria shqiptare duhet të gjejë argumentat dhe mjetet e duhura për të bindur jo vetëm Fondin Monetar Ndërkombëtar, Bankën Botërore, Bashkimin Europian dhe aleatët e Shqipërisë, por në radhë të parë qytetarët dhe sipërmarrjen shqiptare që ekonomia shqiptare i ka të gjitha mundësitë dhe potencialet për të gjeneruar rritje dhe zhvillim.

Së dyti, nënvizoi Jaka, qeveria duhet të na bindë se sfidat e qeverisë për formalizimin e ekonomisë dhe luftën kundër korrupsionit janë serioze, të besueshme dhe të mundura për tu realizuar. "Qytetarëve dhe sipërmarrjes duhet t’ju kthehet besimi dhe optimizmi për të investuar në ekonominë e vendit tonë", tha Jaka.

Sipas Jakës, nëse krijohet një klimë e përshtatshme për të bërë biznes në kushtet e konkurrencës së ndershme, sipërmarrja shqiptare në përgjithesi dhe Dhoma e Tregtisë dhe Industrisë Tiranë në veçanti është e gatshme të negociojë çdo lloj tarife lidhur me paketën fiskale, por gjithmonë për vitin 2015, pasi qeveria të japë provat në realizimin e sfidave që ka marrë përsipër. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin