10/12/2013 18:27:20

Kod etike. Larg shkollat nga propaganda politike !

Ministri për çështjet vendore, “qeveria është zotuar ta largojë arsimin nga praktikat e paligjshme dhe korruptive të përdorimit sistematik të mësuesve të shkollave për veprimtari politike''

TIRANË - Ministri për Çështjet Vendore, njëkohësisht Koordinator Kombëtar kundër Korrupsionit, Bledi Çuçi (fjala e ministrit) i pranishëm në aktivitetin e zhvilluar sot, në prezantimin e Kodit të Etikës së Mësuesit në Arsimin Parauniversitar Publik dhe Privat, tha se “qeveria është zotuar ta largojë arsimin nga praktikat e paligjshme dhe korruptive të përdorimit sistematik të mësuesve të shkollave për veprimtari politike, në interes të kësaj apo asaj partie”. Pasi e vlerësoi promovimin e Kodit të Etikës si një hap shumë të rëndësishëm për të siguruar një sjellje uniformë në të gjithë shkollat e vendit, ministri tha se, “të parët në sfidën e vështirë për të ndryshuar me themel vlerat dhe moralin e shoqërisë, janë pa diskutim edukatorët dhe mësuesit. Për këtë arsye, shembulli i tyre personal gjatë ushtrimit të mësuesisë vlen më shumë se mijëra fjalë. Për rëndësinë e veçantë që ka arsimi në strategjinë kundër korrupsionit dhe planin e saj të veprimit, ai do të ketë një fokus të veçantë”. Listimin e Shqipërisë, e 116-ta në Europë përsa i përket perceptimit të publikut për korrupsionin, në sektorin publik, Çuçi e cilësoi si “një këmbanë alarmi jo vetëm për qeverinë, por për gjithë shoqërinë”. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin